أنا كده

Hi, it’s me again, back!

شيء مهم أنك تبقى عارف نفسك أو بتحاول تعرف نفسك ..عندك فكرة كويسة عن انت مين ومحدد ايه هي أولوياتك .. ايه هي الحاجات اللي بتفرحك والحاجات اللي بتضايقك .. والحاجات اللي مابتفرقش معاك أصلا!

ايوه ده لازم وضروري عشان عشان تقدر توجه اختياراتك وقرارتك .. أه مش سهل .. بس ضروري عشان ماتلاقيش عمرك بيضيع عالفاضي ..الفاضي بتاعك انت .. حتى لو كان المليان بتاع الناس.

وعشان ماتلاقيش نفسك مجرد “another brick in the wall”

يعني أنا عارفه أن أنا تلك هي التي ..

لازم أفكر وأقتنع بكل حاجه .. وبحب أفكر في حكمة ربنا في أوامره ونواهيه والنظام الذي ارتضاه لنا .. بأحب أفكر في كل حاجه فيه حتى وأنا راضيه ومُسلِّمة بكل حاجه فيها .. لكن برده لازم أفكر.

أنا اللي ممكن أقتنع بحاجه وعكسها في أقل من 5 دقائق .. أنا اللي ممكن أقتنع بأمر أو فكرة  أو رأي وأرجع عنه تاني يوم أو حتى في نفس اليوم وأنا معانديش أي مشكلة طالما تفكيري ومنطقي وقلبي مؤيد ده في اللحظة دي .. حتى لو هيعارضه في الحظة اللي بعدها .. المهم تبقى قيمي متفقه مع فكري وعملي.

أنا اللي ماعنديش مطلق ولا أكيد غير الشهادتين وثوابتها.

أنا اللي ما بمشيش ورا حد ولا عنديش حد مابيغلطش .. ولا عندي حد أثق فيه.

بتحمئ قوي في حاجات معينة .. بتحمئ وصوتي بيعلا وملامحي بتتغير .. أيوه بغضب .. وعارفه السكك اللي بتغضبني وعارفه من حقي ومن حق غيري يغضب عشان احنا بشر .. المهم اننا ما نسوقش فيها.

أنا اللي بحب يبقى ليا مساحتي اللي مش أي حد يدخلها .. وخصوصياتي وحرماتي اللي مش أي حد يعرفها.

أنا اللي لازم يبقى ليا وقت بتاعي أنا وبس .. أعيش فيه دماغي أنا وبس.

أنا اللي مش لازم أشرح كل حاجه أنا مقتنعه بيها وأدي ريبورت عنها ومبرراتها لأي حد.

أنا اللي معظم الوقت بشُك.

أنا اللي ماعنديش 100%.

أنا اللي مش بحب كل حاجه أجيبها تبقى الناس عارفة منين وبكام ولا عايزة أدخل في السباق ده .. وأحيانا بتخنق من اللي عايشين بده وبس عشان ده.. ولا أنا اللي كل حته أروحها لازم أطلع صورها وأعمل check in عالفيس.

أنا اللي مابتفرقش معايا قوي الماركة .. أنا اللي ماعنديش لازم.
أنا اللي ما بحبش أتصنف .. أنا اللي مابحبش حد يعبيني في إزازة أيديولوجية أو  توجه .. آه أنا اللي بحترم حركة اليسار ومش يسارية .. وبتخنق من ممارسات الرأسمالية عندما تتوحش ومش اشتراكية .. أنا الملوخية والمهلبية لأني لا درست ولا قرأت ولا عرفت كفاية _لا أنا ولا اللي بيكلمني على فكرة- عن أي حركة أو أيدولوجية أو حتى دين ..  فبلاش تصنفني عشان بس تهاجمني أو تحصر عقلي وتصرفاتي.
أنا اللي بكره فكرة القطيع وأني أسلم إرادتي وعقلي وقراري وأتبع حتة بني آدم اللي هو أصلا بطبعه أناني وخطاء .. سواء قطيع وراء الفكر القديم لمجرد أنه قديم ومجربينه .. أو "خرفان" المرشد .. او "خرفان" ابواسماعيل .. أو خرفان "البوب " !!
 ( خرفان عشان اتباعهم ومشيهم ورا الأسماء دي أصلا وده رأيي الشخصي مع احترامي أن كل واحد يتبع اللي عايزه ويمارس حقوقة السياسية بالطريقة الشرعية والديمقراطية اللي تريحه بس مع حريتي في أني أشوفه زي ماأنا عايزه :) وبعتذر عن استخدام لفظ "خرفان" اللي بكره استخدامه جدا بس فعلا اللي بشوفه على الفيس بوك لوحده من لجان دول ودول ودول , مابالك أسلوب التحاور بهدف التخوين والفرهدة بس , دا غير اشتباكات أيام الجمع في الشارع اللي تخلي بني آدم بضرب أو يقتل أو يتنهك بني آدم أخوه في الانسانية أو الدين أو الوطن .. كل ده بيبررلي استخدام كلمة "خرفان" ككناية عن الاتباع والانقياد بلا تفكير.
أنا المسلمة اللي بحب ديني وبحتكم بيه وهو المصدر الأساسي والفصل اللي بارجع ليه في أي حاجه وأرتضي دائما بحكمه عن إيمان وتصديق , بس بتجنن لما ألاقي حد عايز يخلية مصدر المعرفة الحصري والوحيد ليا وكأننا عايشين على الأرض لوحدنا ويبقى عايز يحصر التاريخ على الـ1400 سنة اللي فاتو في شبة الجزيرة وشمال أفريقيا وأقاصي حدودها شرق وغرب بس.. أيوه من حقي أعرف وأفهم وأدرس أي ثقافة بتاعة أي مكان وزمان وحضارة ومرجعيةعاشت على الأرض كلها .. أعرفها وأفهمها ولأتواصل معاها كمان .

أنا اللي بيفرهدني اللت والهري والزن . أنا اللي مابخافش أعبر عن رأيي ومشاعري بس بزهق من مناقشتها.

أنا اللي مابحبش أطلب حاجه مرتين.

أنا اللي باعتبر الشتمية  لو في ضهرك  ممكن تبقى وصف لكن لوفي وشك تبقى إهانة.. وأنا اللي بحس اني في كلامي العادي مع الناس العادية بعيدا عن الأوساط والأجواء الرسمية لو ماستخدمتش كل وصف بلفظه طالما لا يخدش الحياء أبقى بخون صدق كلمتي.. أنا بفكر كده.
أنا اللي مابحبش ولا بطيق البنطلونات السكيني ولا أي حاجه ضيقة بغباء كده .. وأنا اللي شايفه أنه من حقي ومن حريتي لو عايزه ألبس حاجه مش هي الموضه ومش هي اللي متفق عليها القطيع أني ألاقيها متوافرة وألبسها .. من حقي ألبس جزمة ببوز عريضة في الوقت اللي كل الناس بتلبس جزم ببوز طويل .
وأنا اللي بحس أن اللي بيدخن في وشي بينتهك حرمتي وحقى في نفس هواء أنا ما أذنتلهوش يملأه لي زفت ودخان.. مع احترامي الكامل لحقه في التدخين . بس بعيد عني :)
وأنا اللي بحس أن دماغي بطقطق لما حد بيقعد يهري وياكل في وداني في أي كلام على الموبايل لأكتر من خمس دقايق..
وأنا اللي مابحبش آخر زرار في كل حاجه والـ extreme في أي حاجة .. أنا اللي مش بحب المياه الساقعة تلج .. ولا التكييف اللي على 17 .. ولا التليفزيون العالي .. ولا المروحة اللي على 3 .. ولا عداد العربية اللي لازم أجيب بيه ال 200!!
مش لازم أقدم أبحاث علمية عن أضرار المحمول أو أضرار الدخان .. أو أدخل في كم المناظرات والسجالات والمجادلات السفسطائية عشان الناس تحترم رأيي أو انطباعي أو رغبتي !!

............................
أنا اللي واللي واللي ......
حاجات كتير ما تخصش ولا تهمش حد غيري ...

أنا اللي مش مهم حد يعرفني بس تفرق معايا أني أعمل تغيير والناس تحس بيا.
كتبتها جايز عشان انا اللي يفرق معايا اني مابقاش خايفة أكون نفسي لمجرد أن حد مستغربني .

#حرية.

..................

أنا اللي مش فارقه كتير وولا حاجه معظم الوقت وعند ناس كتير .. بس أكيد بأبقى كل حاجه في لحظة تانيه عند ناس معينة .. لازم أبقى عارفه في اللحظات دي مكاني فين ومين الناس دي والمفروض أعمل ايه وأعمله صح.

لأن لازم أبقى عارفه أو على الأقل أحاول ..

لأنها بتفرق .. ولأن ده اللي بيصنع الفرق.

اتحدى

Hi, it’s me again, back!

وانت غارق في دوامات الاستمرار ومستنقعات العادي .. يوم بيسحب يوم وسنة بتسرق سنة .. ومفروض بتسحب لازم .. لأن هكذا فُرضت عليك الحياة ؟

لا تخذل الأمانة التي حملتها وقد أبتها السماوات والأرض وتستسلم للعادي . قاوم ركونك للراحة واستكانتك للكسل في "منطقة اطمئنانك comfort zone" , ففي مثل هذه الحياة يكون التحدي ضرورة, ويصير التحدي قرار.

التحدي لازم يكون في حد ذاته هدف. هدف يستحق أن تعيش من أجله وانت متنبه له ومدركه. الحياة عبارة مجموعة تحديات ودي لذتها في حد ذاتها..

اتحدى عقلك ..اتحدى رغبته في البحث والوصول للحيقية ..والانبهار في طريق رحلته لخالقه .. اتحدى قدراته على الربط والتحليل والمنطقة والتحدي الأكبر في قدرة عقلك على التخيل والابداع.

اتحدى قلبك .. اتحدى قدرته على الرحمة والتعاطف ..اتحدى احساسه وإدراكه باللي حواليك..

اتحدى روحك .. في قدرتها على الحمد والتقدير .. اتحداها في إدراكها واحساسها واستمتاعها بكم الجمال اللي حواليها.

اتحدى قدرتك على الصبر .. اتحدى مللك من العلم والتعلم ..اتحدى احباطك من الفشل .. اتحدى يأسك من نفسك ومن الناس ومن الواقع .. اتحدى برده إيمانك بنفسك وبالناس ..

اتحدى رغبتك في التغيير وأملك في الأحسن ..

اتحدى شوقك لبكرة ..

كل يوم اتحدى حدودك .. علّي حدودك كل يوم عن اللي قبله .. اتحدى حدود احلامك وقدراتك وقوة وأثر التغيير اللي بتغيره في نفسك وحياتك وحياة اللي حواليك.

حط التحدي على أجندتك .. حطه هدف .. وأعمل له خطة .

اجعل حدودك هي المقياس.
وتذكر أن "جيد" هو عدو "العظيم" ( Good is the enemy of Great )

#اتحدى . #قاوم.

i believe

Hi, it's me again , back!

 I'd like to share that great Status shared by Dr Amr Khaled on his Facebook Account on May 12th, 2013.

I believe it so.

"لم تكن صدفة !
كانت ترتيب العليم الحكيم
لم تكن شطارتك !
كان مقسوملك من الرزاق الكريم
لم يكن العدل !
كان الفضل من صاحب الفضل
لم يكن عقلك !  

كان فتح من الفتاح العليم ."