بص كويس و حاول تحلها
Hi, it’s me again, back!
لقيت نفسك في المتاهه ..
لازم تختار الطريق الصح اللي هيوصلك للنهاية .. طريق و لازم تختاره و تمشي فيه عشان توصل ..
في الأول عندك خيارات كتير و البدايات كلها مفتوحة لكل الطرق و منفذه على فرص كتير .. طرق كتير و خيارات أكتر و قرارات أهم ..
بس خايف .. خايف بعد ما تمشي و تمشي و تتعب ..فجأة تلاقي نفسك قدام حيطة سد !
حيطة سد قفلت عليك الطريق وانت لسه في نُصُه .. بعد ما تعبت و بعد عمرك ضاع و فرصك قلِّت و رجليك تعبت و حِملك زاد .
عمرك فكرت أن المتاهه دي لازم يكون لها بداية و نهاية .. و ده مش بإيدك .. و انك لازم تتحرك و تمشي رحلتك .. و ده برده مش بإيدك .. بس هتمشي في أي طريق , و إزاي , و هتختاره على أي أساس ..ده بايدك!
في الرحلة ..
لازم تفكر.. لازم تختار و تقرر.
يعني و انت غي المتهه.. في الرحله .. عشان تعرف توّجه بوصلتك صح .. محتاج ايه ؟
محتاج تلف الأرض بطولها و عرضها و زخانيقها ..و تشوف الدنيا .. و لا محتاج تركز مع نفسك و تحاول تطلق روحك و تسمع صوتها ؟!
هتعرف تسمع صوت روحك و لا صوت الناس و المجتمع هيغلوش عليها .. صوت الناس اللي بتزعق فيك طول الوقت عشان تعمل و تكون و تعيش اللي هم شايفينه عايزينه و قادرين يفهموه .. هتعيش انت اللي في مراية روحك و لّا انت اللي في مراية الناس ؟ و لا في المتاهه مش هتعرف تفرَّق ؟
الوقت بيعدّي.
طب لما تبص وراك في آخر الرحلة عايز تشوف ايه ؟
عايز تشوف انجازات كتير وأعمال كتير و مشاريع تامة و خدمات كتير أثرت بها في حياتك و حياة غيرك ؟ يعني مثلا علم نفذت به عمل خدمت به الناس .. شغل كنت ناجح فيه و تلاقي ال “productivity chart” بتاعتك ضاربه في السما , مهام كتير نفذتها فكوَّنت في دورها و مجموعها عمل عظيم , سلم طلعته درجة درجة لحد ما وصلت قمته , أعمال تطوعية و خير كتير نفعت به الناس ؟...........؟ أعمال كتير مهما كانت صغيرة لكن كترها و استدامتها خلقت لك وجود حقيقي و ملموس .
عرق و مثابرة و صبر .. جهد و اجتهاد و سيطرة . مكنه ألماني أصلي عرفت تأدي واجبها بكفاءة و توازن.
الوقت بيعدي.
عايز "دائرة تأثيرك " كبيرة " ولّا "عميقة "؟ و لّا الاثنين ؟
يعني ممكن تبقى مشهور و الناس تشاور عليك و يسمعوا كل كلمة بتقولها و يحسوا و يتأثروا بكل حركة تعملها.. شمعة بتنور محراب الانسانية و بتمارس دورك في دفع عجلة التطور الانساني لقدام .. في مجموعة, جماعة ,العالم كله ! .. و ممكن يكون يكون لك 2 أو 3 بالكتير و انت أصلا ما اختارتهمش بس "انت كل حياتهم! "
لو في المتاهه اتخيّرت بين الأثنين .. هتفضّل انهي طريق ؟
لو حكمتك ساعة الرمل .. و محدود بحجم معين ( وقت ) ماتقدرش تملا بالرمل غيره ؟ تختار تأثير عميق في قلب أم مريضة مالهاش غيرك .. أو ابن تزرع فيه كل أملك و كل بذرك .. أو مُسّن ضعيف عالمه كله هو الماضي و الفطار و الغداء و العشاء و تفاصيل حياتية صغيرة أي تغيير في روتينها بيكون مأساة .. هتقبل بالمعادلة دي ؟ حاضرهم بحاضرك \ مستقبلهم "بمستقبلك" \ حياتهم "بحياتك" ؟
فكر.. انت كده بتعمل عمل عظيم .. و أجره كبير و مضمون في الآخره .. يعني مش خسران .. أٌمّال ايه اللي مضايقك و محسسك انك مضحّي و جاي على نفسك ؟
نفسك ..
يعني ذاتك .. يعني الحاجه اللي محدش يقدر يعملها زيك .. يعني الكلمة أو اللحن أو سحبة الريشة أو "حاجه انت بتطلعها" و لو ما طلعتش منك بتحس انك بتنزف جواك و هتنفجر ! يعني الحاجه اللي لما بتطلع منك وقتها بس بتحس بالرضا ! your TALENT ? your PASSION ?
نفسك اللي عايزه تعمل حاجه بتحبها .. حاجه تنسجم و تتوحد فيها ..حاجه "تكونها" و "تعملها" بروح فنان مش موظف !
حاجه نفسك تهديها للعالم كله يشوفها و يتأثر بيها .
بس في المتاهه ..خايف.
خايف تضيَّع حاجه بتعملها زي أي حد .. و ممكن أي حد يعملها غيرك .. و هي حاجه انت فعلا بتنفذها و OUTPUT طالع منك ( وجودك ) في مقابل TALENT or PASSION ( ذاتك ) اللي لسه مالقيتهاش أو لسه مش متأكد منها .. أو لسه ماحققتهاش على أرض الواقع و حولتها ل PRODUCTIVE OUTPUT ?
If u were to choose only 1, which would u go for: CREATIVE or PRODUCTIVE?
مستعد تاخد المجازفة ؟ تسيب اللي في ايدك ( وظيفة بتاكل منها عيش \ شهادة أخدتها من اللي لازمن و لابد تشتغل بيها \ أي حاجه اتعودت عليها \.....) عشان اللي في قلبك ( حلم \ شغف \ محاولة \ متعه \ ......) ؟
هتقدر تصدق و تستنى كتير عقبال ما يرد لك الصدى و تسمعه ؟ لو الرسايل فضلت تبعتها من غير ما يوصلك رد ؟ و لا هتيأس و تحس أنك لوحدك و تكفر بذاتك ؟
الوقت بيعدي.
طب هو لازم دايما يبقى الموضوع مقايضة و تنازلات و حاجه قصاد حاجه ؟ و لّا الدنيا مراحل و حاجه بتشيل حاجه ؟ و ليه ماقدرش ناخد كل حاجه ؟ .. تفتكر؟
الدنيا زي القطر اللي دايس في طريقه يا تلحقه يا يفوتك وتستنى اللي بعده .. اللي يمكن مايجيش تاني ؟ و لا سيادتك من اللي يبحبوا يستنوا في المحطه لحد ما القطر ييجي و يهدي و يقف تحت رجليهم , و لازم يبقوا عارفين هم في انهي محطة وهو جيّ منين و رايح لفين ؟
الموضوع محتاج شجاعه .
شجاعة انك تحقق تصبر على تحقيق "وجودك " لحد ما تلاقي "ذاتك " .. و لّا الشجاعة أنك تدور و تحقق ذاتك اللي اتخلقت عشانها و ربنا خصّك بيها من دون الملايين ؟ و لّا الموضوع كله وهم كبير و لعب بالمصطلحات ؟ يمكن ..
بس اللي أنا متأكده منه أن أعظم حاجه ممكن الانسان يوصلها أنه يوصل أنه يعمل الي هوّاه .. و يكون اللي بيعمله .. في نفس العملية الواحده في نفس مفردة دالة الوقت .
في الحاله دي هيعمل شغله و يعيش حياته بصدق .. زي ما هو بدون تمثيل أو "حزق كتير مع نفسه ".. كفايه أنه هيقضي وقته مبسوط .. بمزاج و ابداع ..
بس السؤال يكون :ايه المقابل اللي هيدفعه ؟ و لا اللي هيوصل له هو اللي وصلت له يستاهل عمرك قصاده ؟ و لا أصلا السؤال يكون : عشت الرحله نفسها ازاي ؟
ايه الأصوات اللي سمعتها .. صدقتها .. اختارتها .. اتبعتها .. و ايه الأصوات اللي قولتها ..
"الحياة 100 ألف صوت .. ويا بعض مشبكين .
..مهما كان فيك ألف صوت ..
شوف كل صوت جايلك منين ..
و اللي يكون أقرب لقلبك اتبعه اتبعه ..
قلبك يلين ..
علّي دايماَ صوت ضميرك ..
علّي دايماَ صوت ضميرك شوف صداه واصل لفين ..
الحياة 100 ألف صوت .. ويا بعض مشبكين ."
شعره رفيعه قوي .. شعره رفيعه قوي بتربط العمل و النيه و الارادة.. و الأحداث و الظروف والفرص.. و القدر و البشروالزمن , بتربطهم كلهم مع بعض في هندسة بديعه مش أي حد ممكن يشوفها أو يفهمها.
و برده شعره رفيعة بتفصل بين المعني و الروح و المسار.. لنفس الطريق .. لنفس الرحله ; كأن تسير عشان تحس و تعيش وتستكشف و تفهم الحياه في ذاتها ..
أو خالق الحياه و الروح و الكون. الله .
related posts
العمر لحظة
الآن فهمت
says who?
No comments:
Post a Comment