Dilemma

Hi, it's me again, back!
هل معقول أن صافي اليوم اللي بأعيشه كأنا بجد .. وأنا اللي بأبقى متصالحة معاها أو على الأقل قابلاها تبقى ب ٦٠٪ من طاقتها على أحسن تقدير .. لمدة ٥ ساعات بالكتير قوي ..قوي!
خمس ساعات في خمس أيام في الأسبوع.. طول السنة.. عشان تقرأ او تدرس او ترتاح او تخرج او تقضي مشترياتهم او تلعب رياضة وتهتم بجسمك او تقعد مع أهلك أو تسأل على أصحابك .. او أي نشاط يحسسك أنك بني آدم و "عايش" !
المشكلة أن معظم الوقت الواقع واحتياجاتك الفعلية بتفرض عليك "و" مش "أو" !!
ازاي تقدر "تعيش" فعلا في خمس ساعات بس!!
هتجنن.
ياريت اللي عنده إجابة او حل أو رأي في الموضوع ده يرد عليا في كومنت وله الأجر والثواب :)

طب مش يمكن .. طب مش جايز

Hi, it’s me again, back!

بعد طول الغياب .. راجعة بدي J

طب مش يمكن انت مش مركز الكون ولا الدنيا كلها بتدور حواليك ولا حاجه..

ومش يمكن الرزق مش مقاسات محددة بنمر.. مش يمكن كل واحد رزقه بيبقى عمولة على شكل جسمه هو بمقاساته هو بتفاصيله هو.. يعني مش لازم يعني مقاس غيري يبقى هو "المظبوط" عليا ولازم ده اللي يلبسني.. مش جايز يعني أنا ليا مقاساتي وتفاصيلي الخاصة.. وكل واحد له مقاساته هو بس اللي بتليق عليه هو بس ويبيقى هو بس اللي حلوة عليه كده..

طب مش جايز بردو انه بيتم "حشونا" بكم "مبالغ فيه" من المعرفة والمعلومات ! مش جايز نكون فعلا مش "في حاجة" لهذا الكم الهائل والـ flow الهائل من المعلومات عشان بس نبدأ وعشان نشتغل وعشان ننتج وعشان نطلع أي قماش..؟ والموضوع يطلع اننا غرقنا في دوامة كبيرة وأن المعرفة نفسها أصبحت سبوبة وبيزنس زيها زي كل حاجه حوالينا ؟؟

طب مش يمكن أصلا أن كل واحد حر ومن حقه يبث في "الميديم" الخاص بيه واللي لايق عليه ومناسب وراكب على محددات كتير منها الشخصية ، واليبئة، والظروف، على الصحة على المزاج!! يعني مش لازم كلنا نبقى "متقولبين" على مربع معين عشان نبقى "حلوين" أو نبقى "صح" أو على الـ “Right Track”  .. طب مش جايز أن فكرة التراك كتطبيق دنيوي فكرة متخلفة أساسا ؟؟ يعني ناس قبلنا وضعوا "التراك" ده ونفع على أغلبيتهم فعمموا التجربة وأقروا بسلطة ما أن ده "الصح" .. طب مش يمكن ده صح عليهم بس الدنيا عمالة تدور وتلف وتطور والبُعَدا مش داريانين أن في ناس في طور تاني من التطور "التراك / الصح" بتاعهم ده هو مش أكتر من سلاسل لمجرد الاستعباد والتحكم شادة الفينيق للوراء؟؟

طب مش يمكن ان كل واحد من حقه زي المياه والهواء كده أنه يكون عنده "medium" يحط فيه اللي ربنا يقدره عليه من طاقه تطلع في أي صورة تكون .. من غير ما نسجنها في مسميات جدرانها المعايير.. يعني مثلا لازم تبقى وظيفة/ بيزنس .. لازم تطلع منها فلوس.. لازم تحقق من وراها شهرة ويبقى عندك 100000000 "فولور" !!وغير كده تبقى فاشل / مشتت / بتضيع وقتك / ..............

طب مش يمكن أننا فعلا بقينا شايفين ومفتوحين على دوشة و وششششششششششششششش كتير قوي وزحمة احنا فعلا ممكن نبقى أسعد كتير لو نزلنا شوية الستاير عن "الاعلانات" دي كلها ؟؟! علاقات كتير وناس كتير وبروفايلات كتير اتحولوا للوح اعلانات تقلب الدماغ تمام زي بتوع كوبري اكتوبر و نجوم اف ام !

طب مش جايز ان الدنيا فعلا أبسط وأمتع كتييييييييير من كده!

طب مش يمكن انت مش مركز الكون ولا الدنيا كلها بتدور حواليك ولا حاجه..!

بلا ما نسميه

Hi, it’s me again,back!

"اللي ما يتسمى" .. تعبير عبقري لم يتم تقديره كما ينبغي. 

لماذا يجب أن نسمي كل شئ ؟ لماذا يجب أن يكون كل شئ مصنّف ومدرج تحت قائمة ما أو CATEGORY  ما ؟ وكأننا سلعة في سوبر ماركت لا معنى لها إن لم تكن "بتكويد" معين وتحت تصنيف !

ألسنا أكبر من ذلك ..بكثير.

لماذا كل هذا الهوس بتصنيف كل شئ و تسمية كل شئ ؟ من أول ما تحب ؟ يجب أن يكون "شغف" .. ما هو "شغفك" في الحياة ؟ ذلك الشئ الذي يجب أن تترك من أجله كل شئ في الحياة وترمي ما سواه وراء ظهرك !!:s

لماذا كل هذا الهوس بالتعريفات .. لماذا نختزل كياننا وحياتنا ووجودنا في "شوية مصطلحات " ؟ !! لماذا نرفض بعض لمجرد اختلاف في "التعريفات " ؟!

لماذا يجب أن تكون كل خطوة أو حسبة أو شئ له علاقه بعملك تحت مظلة “CAREER”  ؟ لماذا يجب أن كل ما تعمله او تدرسه مرتبط بالـ "CAREER "  ؟!

لماذا أي أفكار أو خواطر أو آراء أو انطباعات يجب أن تكون تحت مسمى من مسّميات "الأيديولوجية"  أو "التيار" أو "الإنتماء السياسي" ؟

لماذا يجب أن تكون كل فكرة أو أطروحة أو فلسفة تحت مظلة "الدين/ديني " ؟

لماذا يجب أن يكون النجاح هو بالضرورة الإنجازات ؟

لماذا يجب  أن ترى نهاية الخط ؟ لماذا أوجبنا على أنفسنا رؤية والإقتناع بنهاية الخط ؟ لماذا لا نكتفي بالنقطة ؟ لماذا لا نُخلِص للنقطة التي نقف عليها الآن ؟  حتى لو كانت مجرد نقطة ضمن نقاط مبعثرة ؟ أو كان ذلك كل ما نستطيع رؤيته .. أو إدراكه .. الآن ؟

لماذا يجب أن يكون كل شئ تحت مظلة هدفك وغرضك الأسمى من الحياة .. ur vision .. ur mission .. ur goals .. ur passion .. ur life purpose..

BLAH BLAH BLAH

لماذا لا أتمرد على كل هذا الهراء الذي تم تغذية عقلي وروحي به طوال حياتي ؟ لماذا لا أتمرد على كل هذه المسميات ؟

لا أمانع being (N/A) ..UNDEFINED .. UNCATEGORIZED.. $VALUE

لماذا ضيعت كل هذا الوقت والطاقة وأطلت في حالة وبلطتت في حالة "THINKING … PENDING .. STEADY……." لمجرد الوصول لتعريفات حادة وإرضاء ذلك الهوس السخيف بالمسميات ؟

لماذا أمضيت كل ذلك الوقت في الحيرة بدلا من العمل ؟

سأتمرد على كل هذا الهراء.  وسأفعل كما بتقول الست تانيا صالح .. "بلا ما نسميه" .

#IWTFM

نظرة أخرى للسماء

Hi, it’s me again, back!

ساعات وأنا سايقة لما بلاقي السما كلها غيمت واتحولت بالمنظر ده .. المنظر ده ما بيحصلش كتير في شتاء مصر.. بس بتبقى لحظة ومنظر له خصوصيته  ومزاجه و "مووده " .. لما ببقى سايقة أو ماشية وبلاقي السما قصادي متسعة بتندهني لحضنها .. لوحة كبيرة في منتهى البساطة بدون أي دوشة أومشتتات .. عامله زي قطعة قماش بقطن أبيض كبيرة بتلفني و بتلف كل الدنيا اللي حواليا ..زي كفن أبيض كبييييير حاضن الدنيا كلها ومغلفها .. ومغلفني جواها .. للحظة .. عشان بخبط قلبي وعقلي بخاطرة الجلال.. وبالحقيقة.

حقيقة اللحظة .. وحقيقة الدنيا .. وحقيقة المُنتَهى.

نقطة بيضاء في غيم سواد

Hi, it’s me again,back!

تدوينة بجمل قصيرة. صيغة خبرية. ما عاد هناك الكثير ليكتب بزبد الكلام. زبد.

لمجرد التدوين.

اليوم تم الحكم على متظاهري ما يعرف بقضية مجلس الشورى بالسجن والغرامة , بعضهم بالسجن خمس سنوات.

في ناس هتقضي خمس سنين من شبابها. شبابها. عمرها في السجن عشان كانت بتدافع عن حقنا المشروع في أن يكون لنا رأي مسموع. حقنا في الاحتجاج على ما نراه غلط , والتعبيرعن الرفض. والمطالبة بالأفضل. ورفع راية الحقوق.

ناس شريفة هتقضي شبابها في السجن عشان عندها مبادئ تنتصر لها , ورأي صريح لا يتلون , وشعور بالناس والمجتمع والبلد أعلى من شعورهم بالأنا. والحق. وشجاعة أنها تعلن ده وتنتصر له .. وتدفع الثمن.

الظلم صار عادي زي ما القهر والغضب المكبوت صار عادي. مش مستاهلين أضيع حبر في التفاصيل.
 

اطلع بره الثلاجة

Hi, it’s me again, back!

عمرك حسيت إنك محتاج تغني بأعلى صوتك وانت سايق جوه العربية وانت قافل عليك إزازك ومعلّي الصوت لغاية ما ذبذباته ودوشته تغطي على دوشة أفكارك؟

بس عمرك ما استجريت تعمل كده عشان "برستيجك" هيروح وشكلك هيبقى "هُزؤ" .. أو ممكن يقولوا عليك مجنون !

انت عارف فايتك متعة قد ايه ؟؟!! عارف كم الأحاسيس اللي ممكن تتحرر منها عن طريق ذبذبات حنجرتك وهي بتتفاعل في أثير مزاجك مع المزيكا الجامدة ودقة الدبكة ..وحنجرة زي ماجدة الرومي ولا هبة طوجي ولا جوليا بطرس .. بعظيم ما غنوا من كلمات ومعاني ورسائل..

تغني بصوتك مسموع عن قناعاتك عن الحب والحرية والقهر والغضب والأمل والماضي و الحرب ..

ح ري ة .

أو تطلع كل غضبك في هزة دماغك على إيقاع أغنية أو صولو  جيتار  روك ..

بس خايف يقولوا عليك مجنون أو فلتان أو .... أو ... أو .. حسب المربع  أو القالب اللي متعود يقولبوك فيه ؟ حتى لو مقتنع أنك فعلا ما بتضرش حد ولا بتأذي حد .. وأنك لو عايز تعمل ده فهو حقك ..بس خايف مرعوب إنك حد يشوفك !

طب عمرك كنت قاعد لوحدك في أمان الله في مكان عام .. وضحكت فجأة .

مأسااااااااااااااااااااة !! انت عارف يعني ايه تضحك من غير سبب !! عارف ان الضحك من غير سبب قلة أدب ! أو هبل مبالغ فيه ! يا أهبل يا أهبل يا أهبل !!  يعني ايه تضحك من غير ما تقدم طلب بدمغة وطابعين بوسطة ! يعني إزاي حضرتك تضحك كده لوحدك من غير ما نبقى عارفين السبب والمبرر وما عندناش اعتراض عليه ومتفقين أنه فعلا مضحك !

يااااا الله. ناس كتير جدا دلوقتي بتحس أنها بتعمل دراسة جدوى ودراسة علمية مفصلة عشان تقرر تضحك ولا لأ.. الموضوع يستاهل يعني نفتح الشفتين ونبين الصفين اللولي وحتة من اللغلوغ ولا ايه.

طب بالعقل كده. احنا عارفين ان طول الوقت الدماغ بيقى ماشي فيها صوتك الداخلي وأفكار وذكريات وتأملات وحوارات وتخيلات من اللي فات واللي ممكن ييجي. ايه الغريب واللي مش مفهوم في أن يبقى في حاجه تضحك وسط كل التدفق ده؟

الأهم ايه دخل أو علاقة أي حد بضحكك .. والأكثر أهمية انت ليه متخيل أن حد أصلا له أن يكون لِيه في حاجه زي قرار ضحكك ؟؟

عارف انك محتاج ضحتك العزيزة دي -اللي بقت بتظهر زي البدر كده مره كل شهر- عشان تقوي مناعتك وقلبك وذهنك, وتقلل الهرمونات المسببة للتوتر, و الغضب و الألم والمشاعر السلبية اللي ما بقاش فيه أكتر منها .. عشان بس تعجب ناس انت لا "تعرفهم" ولا هم فعلا "يعرفوك" .. ولا حتى يعرفوك.

وغيرها وغيرها كتير من المواقف وقِيس انت.

طب هم ليه بيعملوا كده ؟

ببساطة لأنك عايش جوه مجتمع فاضي وما وراهوش حاجه بجد غير انه يقعد ينقد وينظَّر على بعضه . وغالبا هيفضل كده.

وغالبا  حسب نظرية "الأيام السودة " هيجيلك إكتئاب وهيفضلوا يشوروا عليك وينظرروا برده إنك تروح لدكتور .. وغالبا برده هيقطَّعوك لو عرفوا ان ده حصل. #SIMPLY

على أساس برده انه مجتمع حره وفاهم الحرية وعاجنها وخابزها وعايشها وعلى أساسها بيحدد مواقفه وأكواده بحيادية ؟؟

 

السؤال هو انت اللي ليه حاكم نفسك بده ؟ 

ليه قابل على نفسك تعيش بلاستيك. تمثال بلاستيك . أحاسيس وردود فعل بلاستيك .. متبرمج.

اطلع بره الثلاجة.

وعيش واتبسط حسب قوانينك انت .. بما يرضي الله :)