Hi, it's me again, back!
هل قرأت يوم لغة الأزهار واستمعت لهمساتها الحنونة ..تخبرك بأبسط قواعد الحياة وأخبارها ؟
اسمعها بتقول ايه .. #عن ايه.
عن رقة نسايم الصبح الأولى . عن نضارة النور على كل ورقة من ورقاتها لما تفتح .. عن رقة وصحو شعاع الشمس اللي ينور قلبك قبل عينيك :)
عن جمال المكنون ..
عن الجمال اللي لازم تلحقة قبل ما يموت.
عن جمال الخجل .. خجل الورود المستخبي في طيات أوراقها .. جمال وابداع رباني ..
عن جمال مشروع بكره .. عن دورة الحياة اللي لازم تستمر .. برعم يفتح .. روح تزهر .. وورقة تذبل وتقع وتموت ..
عن النهاردة ورقة مزهره وبتتفتح .. بكره اللي وراها تنور وتفتح أوراقها ودراعتها للدنيا ..
عن الجمال اللي على مهلة قوي ولازم يأخد وقته .. حتى لو كان عمره أيام معدودة وقصير ..
عن اليقين في ان كل شئ بياخد وقته .. وكل شئ له عمرة في دورة الحياة .. وأننا كلنا أوراق بتسلم بعضها .. في ديناميكية بديعة من الجمال والتطور .. الحياه والموت .. في أغلفة الصبر والوقت والزمن ..
عن أن كل يوم بيعدي لازم يكون فيه حركه .. في تطور في رحلة الحياة .. ورقه بتتفتح وبترفع عيني للسماء .. درجه درجه .. حركة حركة .. لحد قمة الجمال والنضج والتفتح .. عشان أبدأ رحلتي للموت.
عن أننا لازم نستمتع بجمال كل يوم .. في كل مرحلة .. ونقبل بكل المراحل دي ونتصالح معها ونستمتع بجمالها الخاص وخصائصها .. كل مرحلة وكل يوم وكل حالة على حدى.
عن انك لازم تحاول تفيد .. وعن ان لكل جمال خُلِق من يقدره ويفهمه .. حتى لو استغربته أو رفضته باقي الناس.
عن التكامل بين الناس .. نبقى كلنا مع بعض .. وجنب بعض .. اللي بيتولد جنب اللي بيفتح جنب اللي بيزهر .. جنب اللي ازدهر .. جنب اللي بيموت.
عن اني انهارده ابقى مشروع .. مجرد حاجه "مقفلة" و مش مفهومة ومش مقبولة .. وبكره أكبر واتطور وابقى حاجه حلوة منورة بتفيد العالم .
عن ضرورة انهارده عشان امبارح .. وعن حقيقة ان امبارح جزء من انهارده .. وانهارده جزء من بكرة .
عن "كمال" وروعة النضج والقمة ..
عن اني انهارده ابقى مشروع .. مجرد حاجه "مقفلة" و مش مفهومة ومش مقبولة .. وبكره أكبر واتطور وابقى حاجه حلوة منورة بتفيد العالم .
عن أني أصدق في ده وأؤمن به .. وأصبر عليه .
عن الأمل ..
عن النور والجمال والقوة اللي في الرقة ..
عن المشوااااار الطويل في عمر كل وردة ودورة حياة الأزهار ومراحلها .. الأيام والشهور والفصول اللي بتعدي في عمرها عشان تبان وتتشاف وتتفهم وتتحس في الربيع!
بس الخريف والشتاء والصيف بقسوتهم واختلافهم مهمين عشان لحظة الربيع .
مشوار لازم ولابد منه .. لأن دي سنة الحياه وطبيعة الأشياء .. وضرورة التكوين .. حتى ولو عشان كام يوم في عمر الوردة القصير وأيام جمالها المعدودة.
وعن الناس الحلوة اللي بتقدر تشوف ده في الأزهار وتفهمه وتقدر جماله وأهميته ومعانيه .. وتشوفه كمان في الدنيا والناس.
عن الجمال الفريد المستخبي في أدق وأصغر الأشياء .. اللي مش أي حد يلاحظة ويلقطه وسط زحمة ودوشة ومادية الحياة.. ويقدره.
عن دورة الحياة الطويلة .. لعمر قصير .. وذروة تألق سريعة لجمال رقيق .. لازم يموت وتنمحى أوراقه مع أول ريح .. عشان يرجع تاني ويصحا ويحيا من جديد .. ينام ويصحى .. يعيش ويموت .. وده في حد ذاته نوع من الاستمرار .. ونوع من الحياة .. بس على طريقة الورد :)
عن جمال المجموعة مع بعض وروعة التجانس .
عن الجمال الفريد .. في كلامه ورقته.
عن الجمال الصارخ في الورد الأحمر .. عن شدة الحياه Intensity
عن البراعم .. والتفتح واحدة واحدة .. على مهل وبثقة ..والبدايات .. روح الجنين الحلم في القلب والوجدان .
عن الأمل واليقين في بكره .. وعن الصبر لما يحولوه لمتعة.
عن الجمال.. والرقة .. والأمل ودورة الحياة واستمراريتها .
عن أن أجمل ما فينا عشان يبقى بالبهاء ده والتفرد ده والتأثير ده للأسف عمره قصير.. وبيموت بسرعة .. عشان يلحق يتولد تاني في مكان تاني وزمان تاني . في صورة تانية في مشروع تاني .. عشان لازم نستمر .. نتولد ونموت في بدايات ونهايات.. سريعة .. جميلة .. غير مفهومة .. في ذرا وقيعان ..صعود وسقوط .. ازدهار و ذبول ..حياة وموت ..في كل يوم أو حتى في كل فصل.
قالت لي الورود أن يكفيها رضا ويكفيها سعادة أن يتجلى فيها ابداع البديع الخالق .. تنور في يوم .. ويوم تاني لا يبقى منها أو من حكايتها سوى حبة صغيرة ماتشوفهاش العين ولا يعلم بها أحد .. تحملها ريح مسيَّرها الخالق وموجهها بإرادته وحكمته لحياة تانيه في وجود وصور تانية.
حدثتني الأزهار.
