اطلع بره الثلاجة

Hi, it’s me again, back!

عمرك حسيت إنك محتاج تغني بأعلى صوتك وانت سايق جوه العربية وانت قافل عليك إزازك ومعلّي الصوت لغاية ما ذبذباته ودوشته تغطي على دوشة أفكارك؟

بس عمرك ما استجريت تعمل كده عشان "برستيجك" هيروح وشكلك هيبقى "هُزؤ" .. أو ممكن يقولوا عليك مجنون !

انت عارف فايتك متعة قد ايه ؟؟!! عارف كم الأحاسيس اللي ممكن تتحرر منها عن طريق ذبذبات حنجرتك وهي بتتفاعل في أثير مزاجك مع المزيكا الجامدة ودقة الدبكة ..وحنجرة زي ماجدة الرومي ولا هبة طوجي ولا جوليا بطرس .. بعظيم ما غنوا من كلمات ومعاني ورسائل..

تغني بصوتك مسموع عن قناعاتك عن الحب والحرية والقهر والغضب والأمل والماضي و الحرب ..

ح ري ة .

أو تطلع كل غضبك في هزة دماغك على إيقاع أغنية أو صولو  جيتار  روك ..

بس خايف يقولوا عليك مجنون أو فلتان أو .... أو ... أو .. حسب المربع  أو القالب اللي متعود يقولبوك فيه ؟ حتى لو مقتنع أنك فعلا ما بتضرش حد ولا بتأذي حد .. وأنك لو عايز تعمل ده فهو حقك ..بس خايف مرعوب إنك حد يشوفك !

طب عمرك كنت قاعد لوحدك في أمان الله في مكان عام .. وضحكت فجأة .

مأسااااااااااااااااااااة !! انت عارف يعني ايه تضحك من غير سبب !! عارف ان الضحك من غير سبب قلة أدب ! أو هبل مبالغ فيه ! يا أهبل يا أهبل يا أهبل !!  يعني ايه تضحك من غير ما تقدم طلب بدمغة وطابعين بوسطة ! يعني إزاي حضرتك تضحك كده لوحدك من غير ما نبقى عارفين السبب والمبرر وما عندناش اعتراض عليه ومتفقين أنه فعلا مضحك !

يااااا الله. ناس كتير جدا دلوقتي بتحس أنها بتعمل دراسة جدوى ودراسة علمية مفصلة عشان تقرر تضحك ولا لأ.. الموضوع يستاهل يعني نفتح الشفتين ونبين الصفين اللولي وحتة من اللغلوغ ولا ايه.

طب بالعقل كده. احنا عارفين ان طول الوقت الدماغ بيقى ماشي فيها صوتك الداخلي وأفكار وذكريات وتأملات وحوارات وتخيلات من اللي فات واللي ممكن ييجي. ايه الغريب واللي مش مفهوم في أن يبقى في حاجه تضحك وسط كل التدفق ده؟

الأهم ايه دخل أو علاقة أي حد بضحكك .. والأكثر أهمية انت ليه متخيل أن حد أصلا له أن يكون لِيه في حاجه زي قرار ضحكك ؟؟

عارف انك محتاج ضحتك العزيزة دي -اللي بقت بتظهر زي البدر كده مره كل شهر- عشان تقوي مناعتك وقلبك وذهنك, وتقلل الهرمونات المسببة للتوتر, و الغضب و الألم والمشاعر السلبية اللي ما بقاش فيه أكتر منها .. عشان بس تعجب ناس انت لا "تعرفهم" ولا هم فعلا "يعرفوك" .. ولا حتى يعرفوك.

وغيرها وغيرها كتير من المواقف وقِيس انت.

طب هم ليه بيعملوا كده ؟

ببساطة لأنك عايش جوه مجتمع فاضي وما وراهوش حاجه بجد غير انه يقعد ينقد وينظَّر على بعضه . وغالبا هيفضل كده.

وغالبا  حسب نظرية "الأيام السودة " هيجيلك إكتئاب وهيفضلوا يشوروا عليك وينظرروا برده إنك تروح لدكتور .. وغالبا برده هيقطَّعوك لو عرفوا ان ده حصل. #SIMPLY

على أساس برده انه مجتمع حره وفاهم الحرية وعاجنها وخابزها وعايشها وعلى أساسها بيحدد مواقفه وأكواده بحيادية ؟؟

 

السؤال هو انت اللي ليه حاكم نفسك بده ؟ 

ليه قابل على نفسك تعيش بلاستيك. تمثال بلاستيك . أحاسيس وردود فعل بلاستيك .. متبرمج.

اطلع بره الثلاجة.

وعيش واتبسط حسب قوانينك انت .. بما يرضي الله :)

straight lines.. just a thought

Hi, it's me again, back!

القصة إني وأنا سايقه إمبارح راجعه من الشغل كان منظر السما والسحاب وهم .. أسرني بصراحة منظر السحب بتكثيفتها وأشكالها في أحضان الأشعة الأخيرة لشمس الغروب .. جمال يطيّر الروح وابداع يجنن العقل.. بس السحب أشكالها عشوائية ومنحنيات .. ومن هنا دق على دماغي ملاحظة أن مافيش أي خطوط مستقيمة (مرئية) في الكون والطبيعة حول الإنسان.. خط مستقيم بمعنى خط زي اللي  يبقى مشدود بمسطرة .. مافيش (كاروهات/ جريدات grids/ أفقي ورأسي ومتعامد وزاوية  90 درجة شارب)(خط الأفق هو خط وهمي على فكرة ).
قعدت أفكر طول اليوم وأسأل اللي حولي عن وجود خطوط مستقيمة في الطبيعة حوالينا.. الإجابة اللي وصلت لها - على حد علمي وملاحظاتي- أنه لا يوجد خط مستقيم في الطبيعة. لا الشجر ولا الأرض ولا عظامنا .... ولا ... ولا...
يا ترى ليه ؟ ايه حكمة الخالق في كده ؟
اليوم اللي بعده .. شايفة ال tendency الرهييييبة اللي عند الإنسان لما بيجي يهندس أي حاجه ويصممها للخطوط المستقيمة والموازيات والمتعامدات .. معظم ميله مع تطوره للخطوط المستقيمة.. الأعمدة .. الورقة .. السطور .. الكمرات .. الدواليب .. السيراميك والأرضيات .. الشاشات )away from aerodynam
ics ) هو حابب قوي الخطوط المستقيمة.
ليه بردو ؟
وايه سر علاقة الإنسان بالخطوط المستقيمة.
انهارده وصلت لإجابة .. خبطتت فيا بمعنى أصح :) ببساطة أن الخط المستقيم من أسهل الوحدات اللي ممكن تكررها copy paste بالعبيط.يعني مثلا هيبقى خط بطول محدد وزاوية محددة وسمك محدد وتكرره زي ما انت عايز هتعمل بيه اللي انت عايزه "كوحدة" لتصميمك .. نقرب بمثال لو حد اشتغل اتوكاد مثلا .. لو رسمت خط مستقيم بطول محدد وزاوية محددة و سمك محدد .. إمكانية إني ارسم الخط ده مليون مره بتطابق zero error 100% identical  أعتقد ممكن تكون 100%. خط مستقيم.
بس أنا لو جيت شديت خط بإيدي من غير مسطرة .. ما بقاش مستقيم ولو بنسبة error 0.0001 . ولو حبيت أرسم بإيدي نفس الخط تاني بنفس القلم والماسكة والطول والزاوية .. مش أقدر أخليه خط مستقيم 100% ولا متطابق مع الخط اللي لسه رسمه قبله 100%.

عقلي خدني بالملاحظة دي (بفرض صحتها في حدود علمي المحدود جدا في إطار ملاحظة وخواطر ) أن سبحان الله الخالق اللي خلق الكون ده المنظور لينا بدون وحدة يمكن تكرارها بتطابق. كده كل خط -غير مستقيم- مرسوم في الطبيعة له خواصه وتفرده الخاص وأبعاده و geometry  يقدر يتفرد بيها .

سبحان الله الخالق البديع القدير.
#thought #JustAthought

ذات. وجود. حياة

Hi, it's me again, back!

لو كان التشتت رجلا لقتلته.

ساعات بيجي علينا وقت تحس انك شيلتك ثقلت قوي في الدنيا , وما بقيتش قادر تتحكم وكل حاجه بتقع منك .. وقتها لازم تتخفف.

لازم تشيل من الشنطة والأحمال اللي ورا ضهرك وتكمل رحلتك وتطلع جبلك بحاجه أو حاجتين بالكتير . #تخفف

وقتها لازم تختار. لازم تبقى عارف انت عايز ايه.. بمعنى أصح أكتر حاجه عايزها من الدنيا وقادر تتخيل نفسك وحابب تشوف نفسك وانت محققها وواصل لها.

#choose

وأنا اخترت. بعقلي وقلبي. اخترت الحاجه اللي ببقى مش على بعضي وبحس أن كل حاجه غلط من غيرها. الحاجه اللي لو ما عملتهاش ببقى مش عارفه أعيش.. عارفه استمر حاجه وعارفه أعيش حاجه تانية.

الحاجه اللي عايزه أعملها- ومش بخاطري , بغض النظر عن مربحة ولا لا..مريحه ولا لا.

ذات. وجود . حياة.

كعبوليزم

Hi, it's me again, back!

#عن ده.

و# عن لما يبقى عايش الحياه كده.
طريق ورحلة عبارة عن منعطفات وتقلبات كل ثانية .. في دماغه..  بلا وجهة محددة أو نهاية متوقعة أو مخططة.. 
عايش الرحلة والطريق حتى لو لسة مش محدد المنتهى.
المهم الرحلة والطريق. ده كل اللي قادر يشوفه.

انساب وليه تنربط

Hi, it's me again, back!

انساب وليه تنربط ياللى ف ضهرك جناح 

احزن عشان تنبسط وموت علشان ترتاح 

دا الموت يعيدك لأصلك

 بس انت موتك معصلج 

ياللى انت وشك غريب ياللى انت قلبك محاصرك

بيتنفس حرية .. وبدي هوا .

لا مفر

Hi, it’s me again, back!

لا مفر من إنك تؤمن إن في قَدَر .

حاجات مكتوبة. حاجات مكتوبالك و حاجات مش مكتوبالك – مهما عملت, في حاجات بتبقى مش مكتوبالك من غير أي عيب فيك , ولا تقصير منك , ولا كسل , ولا خيبة و ولا فشل , ولا أي مشكلة فيك.

كل حاجه في الدنيا دي بياخدها ويستمتع بيها الإنسان .. هي عبارة عن "رزق" .

ومش لازم عشان "الرزق" ده اتكتب لغيرك في الصورة دي أنه لازم يكون مكتوب لك انت كمان في نفس الصورة والهيئة .. أو إن ده معناه أن رزقك أقل.

ومش لازم الطريق اللي غيرك وكل الناس ماشينه .. أنه يكون هو ده الطريق الصح (ليك) , لو آلاف وملايين غيرك ماشينه مش عيب ولا تقصير أو مشكلة فيك لو ما اختارتوش أو ما حبيتش تمشي فيه .. أو حتى مشيته بخُطا مختلفة عن خُطاهم .. مش معنى أنه ده مش "مريح" أنه بالضرورة يكون "غلط".

لازم تصدق أن في مكتوب ومقَّدر . وتسلِّم له. وتسلم بأنك ما تعرفوش ولا تقدر تقِّيمه أو تحسبه.

لا مفر من التسليم لده .

عشان ترتاح.

العمى الحلو

Hi, it's me again,back!

WHAT’S REAL ? WHAT’S REAL?

في ايه في حياتي "حقيقي" و له معنى ؟

ده السؤال الأول.

فضلت أسأل نفسي كتير السؤال ده.

 في لحظة معينة بتيجي عليك بتلاقي مفيش حاجه مستاهلة؟  .. ولا بقى لحاجه قيمة بجد ؟ مش قادر تلاقي معنى أو حقيقة في أي حاجه في حياتك ؟ .. كله فوتوشوب وتمثيل واشتغالات وافتراضيات وإليكترونيات؟

يمكن اللي طرح السؤال ده وجعله بالإلحاح ده .. هي الأجواء دي..

غربة .

غربة غير مسبوقة في حياتي أو على الاقل بالتجميعة دي . غربة إجتماعية وطبقية .. غربة سياسية عن كل ما يتعلق بالبلد حاليا أو على الأقل وطني اللي حلمت به في 2011 .. غربة عن كل اللي قضيت عمري أدرسه و كان المفروض أكون أتعلمته وأشتغله صار وكانه خيط الدخان...( بمعنى "عِلم نافع"  مثلا؟؟ = ما كانش يتعزّ يا عنيا ) .. غربة عن فكر ودماغ وأراء وأصوات وتوجهات كل اللي حواليك .

بيئة افتراضية وحدودية ومكانية عايش فيها في البقعة من الأرض التي قُدِّر لك الحياة عليها بمختلف حدودها .

تراب. وساخة. فقر . غباء. لا منطق. ظلم . قسوة ووحشية . قبح.  تيه. لا عدل. عبث منظم و ممنهج . هلْك هلْك هلْك .. هري هري هري؟؟

طب ما هي كده. أرض. طين . دنيا.

هي كده.

و # عن نفسك وروحك وعقلك وجسدك. ذاتك ووجودك.

دوشة. Distractions   تهلك الوَحش .سباقات سباقات سباقات . و صراعات صراعات صراعات . أسواق وبضايع .. كله للبيع ودايما عايز تشتري . زينة وتفاخر .. تطاول و تكاثر. وجري . جري كتير .. في كل الإتجاهات .. أحيانا زي بهايم مسعورة بنجري وندور في دواير.

إنسان .. مقدّر له يكون في المرحلة دي من وجوده كحياة دنيا أنه يكون على طول ناقص مش كامل وفي كبد.. ودنيا.

هو كده.

وأحكام أحكام أحكام !! من أهلك وأصحابك والمجتمع وميراث وسماجات متراكمة تراكم أجيال وأشباحك وشياطين نفسك !

حاسس إن الناس كلها تحولت لحلاليف من كتر ما حدش قادر يحس أو يعبر أو يتفاعل مع كل أعوجاج وإنحراف المنطق اللي عايشينه في كل حاجه أبسطها وأفججها السواقة والشارع  والميديا والزبالة المنتجة دلوقتي من أفلام لأغاني لبرامج لراديو ل ل ل  .............

مفيش إحساس خالص !!

جنون ؟!

ده الواقع . هي كده.

دائما مش عارف . بس أكيد مش راضي . كله مش صح  . كله شمال . دائما غاضب . كراهية . ثم غضب غضب غضب.

ماشي.

بس إن الإنطباعات والمشاعر السلبية والحالة السلبية دي تفضل على طول سارقاك ومتوهاك وهالكاك في دواماتها برده مش صح .. ومع الوقت بتخليك جزء لا يتجزأ من منظومة كل اللي أنت رافضه.

السؤال التاني والأهم : طب وبعدين ؟؟

تحب نجيب شزلونج وتقضي حياتك وتخلص فلوسك على دكاترة نفسيين يتعاطفوا مع المريض والضحية  الكبرى والمجرم اللي جعلهولك المجتمع !! أو تقضيها ولولة مع أصحابك وتقعد تبخ بؤسك وسخطك على أمة لا إله إلا الله في السوشيال ميديا؟!!

الحلين سهلين لكن عمرهم ما هيحلوا حاجه أو يغيروا واقع .

الخلاصة أنك محتاج تغمض عينيك وتقضي وقتك متخدَّر عشان تعرف تعيش في العالم الوسخ ده سليم وصح من غير ما تتجنن. بس صعب. صعب عشان ما ينفعش.. أكيد ربنا وهبنا وكرّمنا بكل الحواس دي + العقل عشان يساعدونا على العالم ده ونعيشه واعين ويكونوا رادارنا الموجَّه بالقلب والعقل الواعي قوي عشان يلقط أي ملمح من ملامح الجمال والإبداع والرحمة .

انت محتاج تخلق الواقع الأمثل بتاعك اللي تقدر بيه تستمر وتعدي إمتحاناتك في الدنيا صح .. "تهندس" بحواسك الواعية والموجَهة بإدارة مشاعر ذكية جدا و مخ نضيف قوي و خلّاق جدا – تعمل على تنظيفة باستمرار من الم*خخة الإجتماعية والإعلامية والثقافية اللي منقوعين فيها دي –  عن طريق انك تعمل "سيليكت " و "هايلايت " بس للي انت محتاج "تفوكِس" فيه.. تبقى شايف كل الصورة بس ظابط الفوكس بتاعك على المهم عندك انت. اللي انت تختاره وانت تحدده. ما تخليش حد يظبطهولك ويعميك عن باقي الصورة.

#العمى_الحلو

اقرأ اقرأ اقرأ اقرأ اقرأ

وفتح شبابيك عينيك

روّق دماغك وروحك .. بالعبادة .. وبالفنون .. وبالعلاقات الإنسانية والأسرية (حسب درجة ارتياحك معاها ؛) )

اعمل أي معروف .. ولو أصغره ولا تحقرنّ من المعروف شيئا  بس بشكل مستمر.

دوّر واسأله و Pursue  طريقه ونوره .. مهما كانت ضلمتك متليطة.

اعمل شئ إيجابي وضروري له نتيجة محسوسة وملموسة .. بس برده بشكل دوري جدا ومستمر جدا حتى يصير عندك كطقس وعادة .. ومش هتلاقي أفيد من الرياضة في ده وأبسطها المشي والجري أو كورة أو أي تمرينات مهما كانت درجتها.

و انتج انتج انتج انتج انتج انتج انتج انتج انتج انتج انتج انتج انتج.

كن موجود.

وخليك ماشي كده شوية زي موتور ألماني . بالضبط زي موتور ألماني حديد تفضل شغال على الفوكس اللي ضبطه مرحليا لحد ما ربنا يفرجها من عنده. وهو قادر.

نرجع تاني لسؤالنا .. WHAT’S REAL ?

الإجابة ..

مش مهم ومش فارقه.

لأن الـ STATUS   بتاعتك دلوقتي :

SEARCHING FOR TRUTH. LEARNING. MAKING MISTAKES.

SEARCHING.