hi, it's me again , back !
لو سمحت , من فضلك , بعد إذنك .. ممكن تحِل عن دماغي !!!
أيوه انت .. انت اللى رابض ورايا من زمان قوي .. من يوم ما كنت صغيرة .. انت اللي كل م آجي أكتب أوأفكر أو أحلم ألاقيك طالعلى ..
توقفني .. تخوٍفني .. ترعبني .. تمنعني .. تقيٍدني ..!
انت " الأشكيف " اللى هايطلعلي بالليل و الناس نايمه علشان يأكلني لو ما سمعت الكلام و غسلت إيدي و أسناني قبل النوم .. انت "العفريت" اللي هايجري ورايا لو ما خلًصت طبقي كله و أكلته لآخره حتى لو غصب عني !
انت اللعبة اللى كنت بأخاف منها و ما بحب أشوفها !
انت عفريت العصابة اللي مستنية بره المدرسة و هاتخطفني لو اتأخرت و ما روًحت طوالًي عالبيت !
إنت عفريت الناظرة اللي رايحه جايه بالعصاية , بين الحصص , مش عارفه أخرج من الفصل أشم نَفَسي .. من خيالها !
انت عفريت المدرس – محدود الفهم و التفكير – اللي بيخسف بدرجاتي الأرض لمجرد أني مش كاتبه الإجابة يصيغة كتاب المدرسة أو المذكرة أو بالطريقة اللي سيادتة تعلًمها !
انت عفريت الإجابة النموذجية – الصحيحة المطلقه ! – التي إذا لم ألتزم بها سينتقص حقي من الدرجات !
انت عفريت المنهج التي حُرٍم علينا الخروج عنه كما حُرٍمت التفاحة على آدم !
انت عفريت "الحمار" اللي مش شايف شغلة كويس و مش عارف شغلة أصلا اللي غلطتة ستأتي على حظي أنا و تدوًخني السبع دوخات و مش يعيد يودٍيني في ستين داهية .. و الغريب إن أنا لازم دائما أكون عامله حساب " الحمار" ده !
انت عفريت المجرمين و الساقطين و المهمًشين و الضايعين و المكبوتين و المحرومين في المجتمع اللي مستنييني عشان يطلًعوا غضبهم و وحشيٍتهم و تعاستهم و ضياعهم عليًة .. انت العفريت اللي بيخلٍيني أخاف أمشي فالشارع لوحدي !
انت عفريت سوًاق التاكسي اللي لو ركبت معه وحدي سيخطفني !
انت عفريت المجموع و التنسيق اللي سيحدد السنوات القادمه من عمري و الدراسة اللي سأدرسها و الشغل اللي سأشتغله !
انت عفريت دكتور الجامعة المستبد اللي فى ايده يسقًطني لمجرد أي اختلاف في الرأي أو أني ببساطة شكلي مش عاجبه !
انت عفريت الآخر اللي ممكن يحتسبني على أي جماعه أو يصنًف فكري لمجرد ان شكلي كده !
انت عفريت كل النقـد اللي اتوجٍهلي على كل حاجه و عشان كل حاجه .. أصل النقـد ده هواية عند البعض و ضرورة عند الآخر!
انت عفريت كل الفشل اللى يتمناه لى البعض و يتصيًده الآخر !
انت عفريت اللى فاهمني غلط .. و اللى مش فاهمني .. و اللى ما بيفهمش !
انت عفريت الأهل اللى بأخاف منهم .. و بموت عليهم !
انت عفريت اللى بالى بالك .. و بال أي حد .. و كل اللى لازم يتعمل حسابه !
انت العفريت .. عفريت كل العفاريت الشيطانى .. اه شيطاني .. بس أنا اللى و انتم و هم .. و أوهامنا .. و ............. و ............... و...............
كلنا و كل حاجه .. و ولا حاجه .. اللى صنعـوك .. و لًا جيت زي ما جيت من ما جيت ....
بس حل عن دماغي ..
عايزه أعيش .. عايزة أتحرك !
No comments:
Post a Comment