صباحو

hi ,it's me again, back !

رغم كل شيء .. صباح الفل
ماهو لازم يبقى فل و جميل عشان نقدر نكمًل و نعيش .. حتى لو ..
كل يوم لازم أصحى بميت ألف رنة منبه و شبشب عشان أفارق مخدتي السعيدة و مملكتي البهيًه – السرير , قصر مملكة النوم و الأحلام ..
ما أخبيش عليكم موضوع " القَوَمان" ده بيبقى أسهل شويه لو شارب كوباية مياه قبل النوم .. على الأقل بيبقى لك هدف تقوم عشانه !
هدف تقوم عشانه ؟! زي إني أروح الشغل مثلاً .. بمجرد أن أغسل وجهي و أتوضأ وأصًلي حتى أبدأ سيمفونية ملل و لكاعه رهيبه – حتى أنا لمًا بأفتكرها ببقى هتشًل ! – فى اللبس اللى بأقعد ليلاتي أحضَر فيه من مكوى و تنسيق و تحضير ازازة المياه – أصلي بأقرف من أزايز المياه اللي فالشغل , كل واحد "بيتفتفلي" فيها شويه - ولو لحقت باكللي بقسماطه وللا بسكوته و أجري عالشغل , أصلي دائما حاسًه أني متأخره .. أدًارى ورى نظارة الشمس – حبيبتي- اللى واكله نص وشِى و أنزل أمشى حتى المحطه , و خلال تلك المشيه القصيرة أنظر للسماء و العمارات اللى بيبقى شكلها همدان و نايم و معمََص كمان عالصبح و أنؤ شويه على كل النيام سعداء الحظ :-) !
وتبتهل أساريرى عندما أراه قادما .. هاهو قد جاء .. أني أسمع كلاكسه و نداءاته .. و طبوله على رأى الناصر صلاح الدين .. صديقى السئيل .. الميكروباص !
أدخل و يا سعدي يا هنايا لو لقيت مكان جنب الشباك .. أو أتلقح على الكراسى ال fold اللى غالبا ما بتكون بايظه , إما مالهوش ظهر أوظهره متكىء على رٌكَب اللي وراه !
و بعد المشوار مش عارفه كام بعد المائه , وجدت أن أفضل سبل التعايش و التأقلم مع هذه الوسيله / هذا العالم- هي القراءة أو تأمل أدق تفاصيل الإعلانات في الشارع أو النوم , أو كيفما تشاء حتى " تفصل نفسك " عن هذا العالم و "تستغيِِب " .. ايه..عايز تركز؟ طب خُد عندك .. عربيه بايظه , سبحان الله ماشيه إزاي ..سجاير ..شريط كاسيت مزعج و هابط يصَدًع دماغ بلد .. بلطجه و قلة أدب في السواقة .. لا توجد قواعد .. فوضى ..عايز تغير الواقع ده .. حل من اثنين.. إما خناقه و شد مع السواق .. و الناس طبعا آخرتنبله وصمت.. أو تتفضل تنزل فى أي حته .. للأسف , القانون الوحيد السائد هو مزاج الباشا السواق ! :-( !
الحمد لله وصلنا بالسلامه و نزلنا مطرح ما نزلنا .. الموقَف .. هو مقلب زباله بشكل أو بآخر .. تفانين مصريه خالصه في التشوه البصري و الذوقي و الأخلاقي .. for non- human beings designed كل حاجه تسير بتناغم و COMPATIBILITY مع حقيقة أننا دول عالم 300 مش ثالث !
و تــَـعــــــــــــــــــــــــــــــــايَــــــــــــــــــــــــــــــــش !!
نرجع تاني للهدف .. الشغل !
ألًلك الشغل .. إمضاء حضور .. إمضاء انصراف .. و أهلاً و سهلاً و حاضر و ....و حاجات كده في الوسط .. أما الشغل فيبدو أنه من الكماليات ! كله زي بعضه .. .. مافيش جديد مافيش مفيد .. من الآخر , كله عند العرب صابون !
و نفس الحكاية في مشوار العوده الميمون !
و أنـــــــــــــــــــــــــــــــــــــــــــــــــــــــــــــــــــــــا !
أنا فين من كل الدنيا دى ؟ .. من أول ما بأصحى لحد ما بأروًح .. كلها حاجات لو حبيت أعيش فايقه و مركزه .. وسمعت شويه لصوت روحي اللى عاملاها silent معظم الوقت .. ألاقيني زهقانه و أرفانه من كل ده .. رافضه كل ده .. غضبانه .. بس و بعدين ... ؟؟
في كل الأيام ... for the unknown ! !status : waiting .. Anticipating
و الحمد لله المسكنات موجودة ,طلًه حلوة على النيل العظيم , أذكار الصباح , ذِكر الله اللي كله غزة و نور وفتح , بمجرد أنى أوصل الشغل , لازم أفصل , و بس أدخل المكتب و أشغًل التكييف و أشم شوية هواء نظيف من نِفسي , وكوباية القهوة التمام , حبيبة قلبي- وشوية مزيكا على مزاجى – بس بأوطى صوت علشان شغل و حركات و كده - , مقاله حلوه في الجورنال تقول الكلمة اللى في القلب أو فكرة جديدة , و شوية fun مع أصحابي الحلوة في الشغل – بعيد عن " المأسفناتية !
لازم الدنيا تمشى , والصباح يبقى زي الفل .. مش فزلكه و لا ضحك على نفسي .. الموضوع ببساطة إيمان .. إيمان بأن الدنيا حلوة و أنا مخلوق سيِدها , إيمان بمبدأ العدل و التوازن .. الكيمياء و الفيزياء و الرياضة و ال structure قالوا كده , إيمان بحكمة ربنا.. الكون ماشي كده .. إيمان بإن بكره أحسن .. بكره فرصه .. بكره لسَه بتاعى .. إيمان ب ............و ............. و.................
باختصار, هو إيمان أو إحساس , معظم الوقت مالهوش أسباب واضحة أو دليل ملموس .. أصل طالما أنا قادر أشوف كل هذا القبح و السوء .. أكيد لزوم ال balance هناك قدر رائع من الجمال المكافىء .. بس هو يمكن معمول hidden .. go activate it !
الدليل موجود في الحياة ذاتها و على مداها .. جوانا و جوَه الناس اللى بنحبهم .. و الحاجات االلي بنحبها .. و الأماكن اللي بنحبها .. و الحواس اللى أنعم الوهَاب الكريم علينا بيها .. بس احنا نشَغلها بمزاج ;-)
و علشان نكسر الروتين , كل يوم صباح مختلف ..
صباح الفل , صباح الورد , صباح القشطة , صباح الجمال , صباح العسل , صباح الحبايب , ... ;-)
صباحو ;-)