اللي ايده في الميَّه..

hi, it's me again, back!

الألم ..

احساس لحظي قاسي و فظيع أعتقد ان مافيش حد ممكن يحس بيه زي صاحبه .. أو اللي عدى عليه الألم ده قبل كده .. غير كده ما أعتقدش ان ممكن حد يقدر يحس بتأثير الاحساس ده على البني آدم .. أبداً مهما كانت درجة التعاطف !

و احساس أكثر قسوة انك تشوف قدامك حد بتحبه بيتألم و انت مش قادر تعمل له حاجه.. نوع تاني من الألم .. بتحسه و انت عاجز !!

العجز..
عارف يعني ايه تبقى نفسك في حاجه عايزها قوي .. و مش قادر !!
حاجه تبقى عايزتحققها و بتحلم بيها و مش عارف توصل لها .. و تلاقي الأبواب كلها عليت قوي و اتقفلت !!

الفقدان ..
عارف لما حد يبقى وحشك قوي .. قوي .. و عايزه قوي .. و محتاجه قوي .. عشان تمسك ايده و تقول له كلمات أخيرة.. زي.. بحبك .. أو أنا آسف .. أو انت جميل قوي و أنا اللي ما كنتش فاهم .. أو دلوقتي عرفت قيمتك ...
واحشك قوي .. قوي .. و مش قادر تروح له أو تكلمه .. عشان مات !

اليأس ..
لما تحس انك لوحدك و انت في وسط أهلك و أقرب الناس ليك .. و مش لاقي حد تكلمه و لا لاقي للكلمات معني .. عشان مفيش فايده !!


الغربه ..
لما تحس انك و حيد و غريب و مش لاقي نفسك ... و لا حد لاقيك أو حاسس بيك.. لما تحس انك "مش متشاف" !

الفقر ..
لما تحس ان ماعندكش حاجه تديها لحد أو تشاركها للعالم !

...............................


احاسيس كتير قوي ماحدش بيقدر يقدّرها أو يفهمها غير صاحبها . أحاسيس مش للمشاركه .
ببساطه لأن اللي ايده في الميَّه مش زي اللي ايده في النار !


دا عشان لو حد سألته "مالك ؟ " و ابتسم لك وقالك "الحمد لله " و هو بيهرب بعنيه لبعيد ...