خرونج !!

Hi, it’s me again, back !

خرونج !!

كلمة في العامية المصرية .. قد تكون سمعتها في أغنية أبو الليف .. أو ضحكت عليها لما عمر الشريف قال ل " لوسي" في فيلم اشاعة حب " انا خرونج يا خرونج " .. أو يمكن في مسرحية لعادل إمام ..

"خرونج " كلمة مش هتلاقي لها ماده أو تعريف في المعجم .. بس ممكن تلاقيها جواك و حواليك .

لكن في اتفاق ان معناها هو الشيء أو الشخص الذي لا أهمية أو قيمة له .

أنا بكتب عن "خرونج" التي ألاحظها و اشعرها في الحياة .. اللي أنا بأحاول تعريفها.

طب هو معناها ايه ..

يمكن انك تكون حاسس بحاجه و ما عندكش الجرأة انك تعلن عنها ...

أو مؤمن بموقف بس مش عايز تنصره و تدافع عنه أو تبذل ليه...

حاجه كده زي ميوعه .. مافيش حاجه واضحه زي النور أو صريحة زي حد الزجاج ..

انك تكون بأكتر من رأي و أكتر من موقف على حسب الظروف و حسب الموجه .. و تتلون و تتغير حسب الأغلبية اللي حواليك .. ده كده منافق و هو عارف مع نفسه و واعي انه بيكدب..

 خرونج بقى انك تبقى مستريح قوي و حاسس ان كل شيء طبيعي و انت بتقدم تنازلات ورا تنازلات عن قيم انسانيه و دينية زي الصدق و الشجاعه.. و تتأقلم و تتأقلم و تتأقلم !

خرونج لما تعيش بس عشان نفسك .. طالما انت في أمان و في التمام و بعيد عن أي خطر مش مهم أي حد تاني .. الناس عندك لو مش زيك و مش شبه عائلتك أو أصحابك يبقوا مجرد حشرات .. ملهاش حقوق و أقل من أن يكون لها إراده .. لو صوتها طلع و أزعجتك و عكرت صفو مزاجك يبقوا حلال فيهم يتفعصوا و يروحوا في داهيه .. لأنهم لم يرتقوا لمنزلة الانسان المنظم المتحضر المهم الناجح اللي زي سيادتك .. لو عندك القدره أنك تمنطق و تفلسف هذا المنطق و تبقى مقتنع به و مرتاح له .. تبقى خرونج !

لما تشوف الظلم و القهر لبني آدم  .. و تبرره و تلاقي له منطق .. عشان الحته اللي جواك اللي اسمها نخوه متصفَّرش و تزعج صفو سيادتك .. تبقى خرونج !!

لما التردد يزيد جواك عن حده لدرجة ان يمنعك أن تستجيب لصوت ضميرك في الوقت المناسب .. تبقى خرونج !!

لما تحاصر نفسك بحجج و أوهام عجزك عشان خايف من فكرة الخطأ أو الخسارة .. تبقى خرونج !!

لما تستسيغ الذل و الاهانه عشان العيش .. تبقى خرونج !!

لما توافق تقايض حريتك بأمنك .. و توافق تؤجل أو تتغاضى عن قيم زي القصاص و العدل و الحساب لمجرد الاستمرار أو بحجة الاستقرار .. تبقى خرونج !

لما تقنع نفسك أنك تصدق الكداب و تثق في الغشاش .. و فعلا تقتنع .. تبقى خرونج !!

لما تحس اني بأكتب "بمبالغه" .. ممكن فعلا تبقى خرونج أو أنا اللي على الأرض الغلط !

أنا عشت و كبرت في حكم أكبر خرونج .. عمره ما نصر حد أو قيمه .. ولا عمره انتصر لبلده وناسه .. و يمكن اتخلع بس نظامه لسه لابد في النفوس .. جايز بحكم عشرة 30 سنه ..

و يمكن هي دي المشكلة !!