آخر تدوينة في 2013

Hi, it's me again , back!

في آخر تدوينة في 2013 ..

2013 !!

ياااااااااااااه على السنة دي ..ولا كأنها عمر بحاله.. يمكن عشان ماعداش علينا أحداث زيها قبل كده بالمنظر ده .. بالعنف ده ..بالحدة دي .. بالتطرف والاستقطاب ده .. سنة زلزال.

يمكن عشان مافيش حاجه بكرة بعد 2013 ممكن تكون زي ما قبل 2013 .. البلد .. "الثورة" .. الناس ..قلوبنا .. وشنا لما بنبص في المرايا أو في عيون حتى أقرب الناس لينا.

السنة دي كانت فعلا حاجه زي زلزال .. ومنخل لأفكار كتيير وقناعات كتيرو مفاهيم أكتر.. زلزال قلب وعقل.

صور كتيييير صورتها .. كان نفسي أطللعها وأدونها ..بس كسلت !

كلام كتير وأفكار أكتر كان نفسي أحطها في تدوينات ..بس حسيت في وقت ان الكلمات تيبست على أطراف أصابعي و رفضت رفض تام انها تمس الكيبورد .. حسيت أن مالهاش أذن تسمعها ولا عقول قابله غير اللي عايزه تشوفه وتسمعه وبس...

أوقات كتير حسيت اني فعلا مش عارفه حاجه .. وما بقيتش فاهمه حاجه .. واني مش قادرة أشيل كلماتي.

بس بقدر صعوبة وشدة السنه دي..على قد ما نفعتني أكتر اني أقرَّب لنفسي أكتر.. أفهمها أكتر وأقبلها أكتر .. وخليتني أوصل لكام نقطة .. حسبي .

-          بالنسبة "للثورة" .. بما أنها كانت الحدث الأهم والهدف والأمل والحلم منذ 2011 .. مش عايزه أقيمها في اللحظة دي لأني كده هأبقى بظلمها جامد. مش عايزه أبص لدلوقتي خالص بعد كل اللي حصل أو بيحصل.. أنا وصلت انها مستمرة وهتفضل مستمره بس في صورة غير اللي كنا متخيلنها.. من الآخر بدلا ما كنا بنقول "كن مع الثورة" اكتشفت ان الصح اننا نقول "كن أنت الثورة" .
أنا لازم أكون الثورة وأنا بربي  ولادي على الحرية والمساواة والكرمة.. لما كل يوم ارمي أثواب العنصرية المتراكمة في دمنا منذ أجيال .. لما أربيهم يحترموا الشارع والأرض والناس وحقوقهم .. لما أعلمهم ان ليهم أصلا حقوق لازم يطالبوا بيها .. وأن لغيرهم حقوق بردو لازم يطالبوا بيها .. لما أعلمهم ان الكراهية نار ما بتاكلش غير صاحبها .. لما أعلمهم ان عمر ما حق مظلوم بييجي بالظلم .. لو انا مظلوم ماينفعش أظلم عشان أجيب حقي .. لازم أعلمهم يكسروا سلاسل ودواير الكراهية والتدمير والسلبية واليأس .. ان لازم يتعلموا ويتعلموا ويفهموا كل حاجه و يغلطوا ويعترفوا بغلطهم وما يخافوش منه ويبقى عندهم الإرادة والشجاعة انهم يصلحوا ويغيروا.

-          هاربيهم على الحرية مش على القهر والإرهاب والسيطرة والأمر الواقع.

-          هأربيهم على مفهوم "الحرمه" ان حاجات كتيييييييييييييير لها حرمه ولازم تحترم.

-          هأربي الولد يحترم البنت والبنت تحترم الولد.

-          هأكسر معظم التابوهات السمجه اللي توارثناها.

-          هأربيهم ان ما لا يدرك كله لا يترك كله.

-          وأكتر حاجه سأحاول جاااااااااااااااااهدة أني أربيهم انهم ما يبقوش مع**** .

-          هأعلمهم أن أوسخ فكر هو اسلوب وفكر هأهد المعبد عاللي فيه.

-          و هأعلمهم يقواوا رأيهم بصراحة وصدق .. مهما كان.

بس المهم اني أنا الأول أفهم ده كله في وسط "المعككه" و"المليطة والزيطة" اللي عايشينها دلوقتي وأصدقه وأقتنع بيه واتصالح عليه وامارسه قبل ما أخلفهم عشان أعرف أربيهم عليه.

-        مافيش حاجه مطلقة .. ومافيش مفاهيم مطلقة .. ومافيش جهه أو حد مطلق .. نسبة 100% و الـ 0 -1  والـمباريات الصفرية مش موجود غير في العقول الوسخة وبس!

-          التنطيط على خلق ربنا بأي حاجه ربنا هو اللي منّ عليك بيها واصطفاك بفضله هو مش شطارتك انت (عائلتك ..كليتك..فلوسك ..حاجتك ..شهاداتك ..بتاكل ايه ولا بتلبس منين ..ولا بتشتغل فين .. ولا بتخرج وبتسافر فين ,....) هي فعلا لحظات وطيان أصلي.

-          عادي اني أبقى مش فاهمه .. ولا عارفه . عادي اني أغلط .. عادي اني حتى أتناقض مع نفسي ومع فكري .. لأن غير كده هأبقى مش عايشه ..غير كده هو الجمود .. الموت حيا.

-          طالما عايشه لازم أفكر بنفسي .. وما أخافش أراجع نفسي .. أغلط .. وأتوه شويه ..واتلخبط كتير .. واهدا .. واتجنن .. واشتغل كتير وابطل كسل ودلع لحد ما أوصل للي عايزاه وأدور على حلم أبعد وهدف أعلى.

-          كفاية هري .. حراااااااااااااااام كل الطاقة والوقت تضيع في الهري!! تليفزيزنات هري ..حوارات ونقاشات هري .. كتابات هري أو قراءات هري.

-          أهم حاجه فعلا محتاجين نعملها في حياتنا عشان نخرج من النفق المظام والسواد اللي في عقولنا وقلوبنا غير اللي في واقعنا ..هو اننا  نقرأ.
لازم نقرأ كتييييييير قوي .. حاجات نظيفة مفيدة .
-      ماتخليش حد لا يبتزك عاطفيا .. ولا يبتذلك عقليا. ما تسمحش لحد يلعب معاك اللعبة دي أو يحطك على مربع ويحبسك في إطار هو عايز يلزقك عليه.

-          لازم يبقى في "سيستم " صح .. وناس تطبقه .. ونشتغل. جامد وكتير.

-          كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري . كفاية هري .

-          استكشف الدنيا .. قول رأيك ماتسكتش ..حتى لو هترجع في كلامك ..ماتخافش.

-          الصحة والستر والحب أهم 3 حاجات في الدنيا دي .. لأن
الدنيا دي حاجه ..متسواش .

و..

HAPPY NEW YEAR EVERYBODY

لأن بكره لازم يبقى أحلى وأجمل.