عالهامش

Hi, it's me again, back!

بكتب التدوينة دي عشان أفضفض عن قلبي شوية , عشان أحكي عن فترة وزمن بقيت شايفه فيه معظم عمليات التواصل سواء الالكترونية في شبكات التواصل أو التفاعلية الحيه زي ما في الصورة دي.

لما يبقى عندك أجواء محتقنة بالشكل ده , واستقطاب حاد من كل شيعة وفريق , كل واحد بيركز وينظر للوجه بتاعة من العملة و جانبة فقط من الصورة , مش قادر يتخيل أو يتصورباقي أجزاء الصورة وباقي أطرافها وبالتالي رافض يعترف بوجود وجه تاني للعملة وباقي أطراف في الصورة..

#الصورة_الكاملة.

ببساطة ما ينفعش. ماينفعش أبقى جزء من أومصب لصفحات معينة على الفيس وأكاونتس معينة على تويتر كل هدفها تسطيح كل شيء وأمر ووضعه على مربع المُضطهد والمظلوم , وتضعك انت دايما على مربعات السخونة اللي بتغلي من القهر ووجوب الانتفاضة , وكل شيئ تتفاعل معه وتشوفه من خلال نظارة الكراهية والسواد والظلم والدم , كل شيء ضدك .. وكلهم ولاد و*** , كلهم ضد مفاهيم في غاية الروعة ماحدش يختلف عليها .. وبالتالي انت ما تقدرش داخليا تقاوم الكلام وتدخله على فلاتر عقلك ..فلاتر المنطق والتفحيص .. يكفي اني أقولك كلهم ضد الدين , ضد الثورة , ضد الحرية , شوف بيعملوا ايه في البنات .. الحراااااااااائر.. وتتحط على مربع العاطفة , عواطف الغضب أو الحمية أو العصبية أو الشعور بالاضطهاد ..كلها عواطف كافية أنها تعمي دماغك وتولع قلبك وعلى أقل تقدير يا إما تبقى شايل في نفسك زي قنبلة موقوتة مستعدة تنفجر مع أي تفاعل , وتكمل بالنمط ده باقي تفاعلاتك في كافة الأمور , أو انك تبقى باقي البنزين المتطاير وامتداد للاشتعال ده .. وتشَّير.

دائما المعلومات مقتطعة, دائما منقوصة , دائما موضوعة في سياق معين مش شرط يكون سياقها .. المهمتبقى عينيك مش قادرة تلقط أي زاوية أكبر من اللي عايزينك تشوفها .. تفضل عايش أعور مش قادر ولا قابل أنك تشوف من منظور تاني أو زاوية أبعد .. لا زم دائما الصورة تبقى ناقصة ..والعملة من جانب واحد.. لأنك لو شفت #الصورة الكاملة هتحصل أخطر حاجه ..

هتفكر .. وهتعدل .. وهتختار بنفسك.

 

ماينفعش دايما تبقى متقولب وأفكارك أو أي محاولة لك للتفكير أو التحقق والتحقيق والتدقيق ودايما محطوط ومتحاصر على مربعات معينة أو ايديولوجيات / توجهات معينة .. ماينفعش .

ماينفعش دايما تبقى "باكيدج" على بعضها كده قالب واحد يإما تتخون تحت أبواق "الوطنية" وأبواق "الثورية" والأبواق" الدينية" .. يعني يا تدوس لايك وتشير بدون تفكير يا تخرس خالص .. يإما تستاهل اللي هيجرالك .. تتخون .. تتكفر .. انت خاين .. انت منافق .. انت ماعرفش ايه .. انتم عبيد بيادة .. انتم إرهابيين ........

#إرهاب_فكري

احنا من يناير 2011 واحنا عايشين كل يوم بمتغيرات عمر كامل .. أفكار بتتغير وبتختبر .. ووشوش بتقع وقلوب بتبان .. شعارات بتطلع كل يوم ..وبقت كل سنه تشوفها بمعنى ومدلول وتطبيق مختلف عن الوقت اللي قابله .. ديناميكية بديعة وفريدة بالتجربة المصرية والبقعة دي من العالم (الشرق الأوسط والمنطقة العربية) يمكن تكون المكسب والثراء الوحيد اللي هيعيشه جيلنا.

كل يوم وكل فترة أي سوي مراقب ذكي محتاج يراجع نفسه ويعيد تقييم أفكاره ومبادئه ويشوف الوضع الحالي ايه ومين الأطراف اللي بتتبنى ايه وعايزه تعمل بيه ايه .. ونفكر (على قد ما نقدر ) بشكل واعي و "استراتيجي " بمعنى انك تبقى شايف انت عايز ايه وعايز تروح فين وفي أي اتجاه ومصلحتك ايه وفين وباقي الأطراف اللي معاك واللي ضدك عايزه ايه وعايزه تروح فين وانت موقفك ايه "استراتيجيا " منهم . كل يوم محتاجين #مراجعات

أنا بكل أفكاري ومصطلحاتي وأفعالي واتجاهاتي بقيت حاسه زي اللي واقف على #رمال_متحركة .. محتاج ديناميكية خاصة ومحسوبة وإلا هيغرق.

لأن ببساطة كم الـ #MANIPULATION  و الإبتزاز العاطفي .. عاطفتك الإنسانية وإنسانيتك .. أو عاطفتك الدينية .. أو عاطفتك الوطنية .. أو عاطفتك الثورية .. وحتي نَزَعاتك العنصرية  اللي بيحصل بحرفنة شديدة مدروسة وممنهجة يشل أي خلايا تدقيق أو تفكير أو رؤية عندك .. بالصور إياها والمفردات إياها و الشعارات إياها .. لازم لازم يحصرك في دائرة رد الفعل ..بحيث ما تحاولش للحظة تفكر..لثانية بالبدائل الكتير والحلول الأكثر مكسبا أو الأقل  خسارة اللي كان ممكن نوصل ليها بشوية سياسة ..بشوية تفاهم .. بشوية صدق وإخلاص .. بشوية وضوح ..

لأ .. لازم كل يجيب آخر ما عنده ..كل يمشي بمدأ التزمت وكرسي في الكلوب.. مبارايات صفرية .. يا أنا يا أنتم .. معايا ولا ضدي .. الحرب .. الحرب .. الجهاد الجهاد .. الموت دون .. كلنا نموت دون كذا  .. كلنا نستشهد دون كذا .. مش الصور بتنزل عالنت وتجيب تعاطف الناس معانا !!! وصلنا لدرجة مقززة ومرعبة من الاستخفاف بالأرواح والبشر والحياة .. حولناهم لسلع وحصّالات تعاطف .. تحت الشعارات والمسمايات والمعارك الوهمية.

المهم مين يكسب في لعبة العند ومين يقول أيّ الأول .. بصوت أعلى !

#ZeroSumMentality    ودوس البنزين عالآخر .. كرسي في الكلوب .....

ولو حاولت تفكر وما تستغلش في المعككة دي  وتشاور لحلول تانيه أو سيناريوهات تانية .. يا ويلك ! على طول يتمارس عليك #إرهاب_فكري والإبتزاز العاطفي ..كل طرف بطريقته.

ببساطة ده برده ماينفعش .

ماينفعش أقبل أبقى مستهلكة طول الوقت في الم*خ** الفكرية دي . طول الوقت على أعصابي في مناقشات #إطلاقية بحتة #Stereotyping  الناس والأفكار والمهن بشكل مطلق.

كل هدفها الانتصار للأهواء مش الوصول لتعارف حقيقي,  بحيث تتحول لكائن غاضب لعان طول الوقت على شفا الإنفجار .. وبس.

نعيش كده في دوائر لا نهائية وتفاعلات تراكمية تصاعدية من الكراهية ..  
 #GoingNowhere

ما ينفعش كل مناقشاتنا تبقى مبنية على أقوال الرويبضة الي متحكمين وطافحين في الإعلام والصحف , مش بس إعلام بس معاهم أبواق كبيرة عامله دوشة .. ما ينفعشتمسك لي كلمة وتقوم "مجوِّد " عليه بمخزناتك وخيالاتك وتقعد تتناقش معايا بيها كأنها حقائق ووقائع حدثت بالفعل ومسلمات .. بدون أي "معلومات أو بيانات " حقيقية موثقة .. كلها أحاسيس وتنبؤات وانطباعات من مخيلتك انت .. ولا من سفاهة تافه في فضائية أو راديو – وما أكثرهم!

ما ينفعش نتناقش بالمعطايات دي.                                    

ما ينفعش تبطل قراءة .. ما ينفعش نبطل نقرأ ونبطل نسمع ونبطل نفهم ونبطل نتعلم .. ما ينفعش تبقى مصادرنا ومعلوماتنا وعلمنا كله من قنوات هابطة ومذيعين أشباه متعلمين بل أشباه بني آدمين ومالناش في المفكرين والعلماء والكتب.

وطول الوقت نبقى قاعدين على شبكات التواصل الإجتماعي "يُقضى " في دماغنا .. وبدورنا "نقضي " في دماغ الآخرين إحباط وكراهية وسواد وتطرف.

 
أنا بأحاول أرفض ده .. بحاول "أفصل " عن ده ..

بس أحيانا ..

للصمت حدود.

زهقت من كم التزييف والغباء والافتراء .. والابتذال.

زهقت من كم الطاقة السلبية والسواد والإحباط.
 

وربنا يعفو عنا ويرحمنا برحمته.