حاجات معينة

hi,it's me again, back!

السعادة ..

ممكن يكون عندك "كل حاجه" .. بمعنى كل المتطلبات المادية في الحياة و ما يتبعها من أدوات و مظاهر الرفاهية بكل تعقيداتها التي تهدف لاشباع غرائز التفاخر و الكبر عند الانسان ..

مال , وجاهه اجتماعية أو "برستيج " , عربية .. و مش أي عربية, بيت مش زي أي بيت , موبايل آخر حاجه!!

الوظيفة السوبر و أنت فيها "سوبر مان"

.......................................

و كمان حط معاهم الصحة .. التي هي أعظم هبة و دونها يتحول كل ما سبق لأدوات تعذيب و ليس سعادة.

صدقني- وأنا أعلم- أن كل المسببات المادية في حال توافرها و انعدام الصحة أو الحرية أو من تشركه معك فيها , تتحول لجمر يزيد من صعوبة الاختبار!

نعم اختبار..ما الحياه لعبة .. و أي لعبة عشان تبقى حلوة و تستاهل لازم يبقى فيها حبة مجازفة على حبة إثارة على حبة ألم على حبة تحدي على كام مفاجأة ما كانش ممكن تتخيلها على كام صدمة .. على ناس حلوة تعرفهم و تحبهم و تعملوا شوية حاجات مع بعض تخلوا بيها حياتكو و حياة شوية ناس تانية أحلى .. أمتع .. أكثر كفاءة .. فيها بعض المعنى.. .........

يبقى كده معانا شوية حاجات بتصنع اللعبة .. أو الحياه يعني.

الاختبار..+ طبيعة الانسان+ مشيئة الله  .
نعم طبيعة الانسان و غرائزة..مثل أنه أغلب الأوقات طماع و لا يملأ عينه غير التراب , وأنه مغرور و يحب يبقى شايف نفسه "حلو" و الأكتر أن الناس تبقى شايفاه "حلو بل الأحسن " , غير أنه في أوقات كتير يفضل يبص و ينظر و العياذ بالله ما يقدرش "يشوف" أبعد من تحت رجليه !!

و في نفس الوقت أنه المخلوق المختار و الأذكى على الأرض , و الأكثر ابداعا و إلهاما !

و أهم حاجه أنه روح و جسد .. مزيج من طين و نور - بكل تناقضاته.. و بكل اعجاز انسجام العنصرين مع بعض و طبيعة عملهم "الهارمونية" !

و كمان قناعة شخصية عندي .. و هي أن الانسان صعب يبقى عنده _أو يُعطى_ كل حاجة في نفس الوقت .. لأن هذا سيكون خطر أو غير صحي .. لأنه ببساطه لو عنده كل حاجه آخر حاجه في نفس اللحظه , و قتها سيتجبر و يتكبر و يفتري و العياذ بالله.

يعني مش هيبقى شايف في الدنيا غير نفسه و لا أكبر و لا أبعد من نفسه .. و دي أخطر و أسوأ لحظه ممكن يقع فيها الواحد !

و هذا من رحمة الله .

من وحي هذة النظرية المتواضعة أقول :

أن هناك حاجات على قد ما قد تكون بسيطة و ثانوية أو كبيرة و هامه .. بس "السعادة" لا تكتمل بدونها .. و لا تشبعنا بدونها .. حاجات ممكن تبقى عامله زي الملح و الفلفل .. حاجات صغيرة محتاجين منها حبه صغيرة.. حبه صغيرة قوي تخلينا نستطعم و نفرح و نحس بالحاجات و النعم الكتيييير قوي و الكبيييييييييييييرة قوي اللي ماليا حياتنا بفضل الله و نقدر نقول كده we took it for granted

ممكن حبة حب .. أو صداقه حلوة .. أو نجاح .. أو رضا .. أو حنان .. أو أمل .. أو أمنية تتحقق .. أو مفاجأة سارة.. أو حد عزيز علينا .. أو حد بنشوف عمرنا فيه .. أو حاجه بنحبها .. أو حاجه خاصه قوي .. بتاعتنا احنا و بس .. أو حاجه لسه هانكتشفها و نعرفها بعدين ..

حاجات كتير ....
حاجات ممكن تكون ضغيرة لكنها تصنع الفرق.
حددها .. قدّرها .. كن شاكرا عليها.. و استمتع بها.