العمر لحظة

hi, it's me again, back! 

دالة الوقت .. دالة العمر.. التايمر اللي شغال على طول و عمّال بيعد .. بينقص مش بيزيد .. أيام بتمر و تجُّر معاها السنين .

حسبتها .. كام ساعة في اليوم بأقضيها في الشغل في أعمال ممله مع ناس ضايعه في كدبه كبيرة , و ساعة رايح و ساعتين جاي .. عمر ضايع فوق الكوبري و اشارات المرور , و كام ساعة في واجبات أسرية و اجتماعية .. دا غير اللي ضايع في الأكل و الشرب والنوم و الغسيل و .........

لقيت أيام كاملة بتعدي من غير ما يتبقى لي و لو نص ساعة أقرا فيها أو أعمل الحاجات اللي بحبها .. أو الحاجات اللي بتبسطني .. و أيام كاملة بتعدي من غير ما تلحق تفرح أو تنجز أو حتى "تحس انك مرتاح " !!

دا غير كام سنه ضيعتها في الدراسة و التعليم .. و وظيفة ما بتحبهاش !

أيام بتجُّر في أسابيع بتجُّر في سنين .. على أمل اللي جاي و اللي هابقاه .. و الفرصه و الوقت المناسب ..  أمنية بتسلِّم لأمنية و أمل بيسلِّم لأمل !

لما حسبتها بالطريقة دي .. بالساعة و اليوم و السنه .. كنت هاتجنن .. و حسيت ان "عمري "بيتزفلط " من بين ايدايا" و حسيت بالسخط و السرقه من و على الجميع !

بس دي حسبه غلط .

اكتشفت ان رغم كل الزمن و الوقت اللي بيمر .. و الأيام و السنين .. كل السنين اللي بنقضيها وسيلة عشان غاية يوم .. و الساعات و الأيام اللي بتشتغلها عشان يوم 30 في الشهر أو السنة الأولى أو المرحلة المعينه .... كل الوسائل في وقت كبيييير عشان توصل للغايات .. ما بيتبقاش منها غير لحظات .. لحظات تكون كام صورة في فيلم سريع في لحظة موت !

اقتنعت اننا ممكن فعلا نبقى عاشين العمر كله عشان كام لحظة .. زي فكرة اللي يلعب ماتش ساعتين و يفضل رايح جاي رايح جاي عشان لحظة الجول .

رافضه ان أشوف أكتر من ثلثين عمري على أنه وقت بدل ضايع .. رافضه الحسبة دي ..

راضية بعمري و راضيه بقدري لو هاعيش عشان بس كام لحظة ..

لحظة صدق .. لحظة حب .. لحظة فرح .. لحظة تشارك فيها صديق أو حبيب فرحته .. أو لحظة تفتكر له فيها موقف و تضحك من قلبك ..

لحظة أترحم فيها بكل قلبي و كل امتنان على أمي بعد كل السنين اللي جمعتنا و كل خناقتنا..

لحظة خشوع في صلاة و يقين في دعاء و فرح بالاستجابه ..

لحظة ألاقي حياتي كلها أو حياة غيري مجرد بيان و دليل لمعنى أو قيمه  في آية من آيات الله ..

لحظة الدهشه .. لحظة لما تكتشف و تبقى مش مصدق ..

لحظة خير و انسجام مع روحك و فطرتك .. و الكون ..
لحظة شجاعه و جرأه و انت وسط الملايين ..

لحظة نجاح أو لحظة انجاز .. لحظة تنتشي فيها و تحس أنك جامد قوي و فخور ..

لحظة ما الفكره تنور في عقلك .. لحظة فهم و ادراك أو تعلم حاجه جديده ..

لحظة حلوة بتقفشها في صورة في برواز .. لحظة حلوه تخلق الذكرى و الاحساس ..

لحظة الحقيقة والفَوَقان ..

لحظة شروق الشمس .. لحظة البرق .. لحظة نزول المطر ..

لحظة حرية و انتصار .. لحظة حق و يقين ..

راضيه أعيش عمري كله بساعاته و أيامه و سنينه عشان كام لحظة  .

بالحسبة دي لقيتني أنا الكسبانه.