نفس المشكلة..نفس الفخ 3 ( انت مين انت )

Hi, it’s me again, back!

" انت مين انت "..

جملة بحس ان معظم الناس بتقولها بلسانها و أفعالها.. و مواقفها .. و المشكله اللي بجد .. قناعتها .

انت مين انت عشان تقول رأيك .. انت مين انت عشان تفهم أكتر من اللي أكبر منك أو اللي فوقيك .. "انتوا لسه شوية عيال .. هنمشي ورا شوية عيال !! "

انت مين انت قدام راجل في سن سيادته و خبرة سيادته .. و حكمة سيادته !!

انت مين انت عشان تنتقد الرئيس و لّا المجلس العسكري !!

ولو –لا سمح الله – جيت في اجتماع أو في حوار و قلت " أنا بأفكر " أو " عندي فكرة " .. تلاقي كله قام "زاغرلك " و باصص لك كده .. و عينه بتحتقرك و مش طايقاك و عايز يقولك : انت مين انت اللي تفكر يا ********* انت هاتفهم اكتر مني و لا انت يعني اللي هاتجيب التايهه .. انت مين انت !!

و الأدهى لما يبقى موظف محترم متشعبط بالعافية في بقايا " الطبقة الوسطى " و يتحمق قوي لما سواق الاتوبيس و لّا العامل و لا حتى الموظف اللي تحته أو شغال عنده يطالب بحقوقه أو يتجرأ يطالب بتطبيق قوانين العمل !!! انت مين انت يا فئوي يا ابن الفئوية ياللي عايز تعطل عجلة الانتاج !!

هم مين هم .. لالالا .. دول صوتهم علي قوي .. مستقويين بالخارج .. هم مين هم عشان الدوشة دي كلها.. هم كام واحد يعني !!!

انت من انت لو جيت تركن في الشاااااااااااااااارع .. انت اتجننت ..دا رصيف البيه .. و اهه .. قدامه طوبه و سلسلة.. يعني قانوني .. انت مين انت ياللي عايز تركن في ملكك من شارع أرض بلدك !!!

انت مين انت لو حاولت تطلع من عربية 4*4  أو بي إم و انت راكب 128 و لا سيات قديمة .. انت مين انت !!

انت مين انت .. انتوا لا بتفهموا في الفن و لا في المزيكا .. خليكوا في الزبالة اللي بتسمعوها .. انت مين انت عشان تقول على الست أم كلثوم صوتها مش حلو و أغانيها مملة .. انت مين انت عشان ماتحبش الست !!!!!!!!

"انت مين انت" الدكتور بيقصي بيها خريج الجامعة .. و خريج الجامعة بيقصي بيها خريج المعهد أو الدبلوم .. و خريج الدبلوم بيقهر بيها العامل ... و الكبير بيهمِّش بيها الصغير ..

" انت مين انت " لو لسه طالب .. لو موظف صغير .. أو خريج جديد .. أو مش من طبقة غنية .. أو مش مسنود .. أو مش ابن مييين في مصر ..أو عندك فكرة جديدة أو اي واحد مختلف  !!

مشكلة لما "انت مين انت" تتحول لسلوك نابع من قناعات .. قناعات ارسختها ثقافتنا التي تميل بشكل كبير للتعالي و الغطرسة و الفوقية استنادا على كل المكتسبات السطحية و الشكلية , بصورة غاية في القسوة و الاقصاء و الرغية في المحو و التحطيم !!
ثقافة تتلذذ غالبا بالتسفيه و تصيّد الأخطاء !!

ثقافة نحصدها مما يزيد عن 30 سنة من  القمع المتسلسل .

"انت مين انت" خلقت سور ورا سور .. قيد فوق قيد .. تحريم على تحريم .. صادرت حقنا الطبيعي في الانسانية واننا نحلم .. و نختلف و نغيًّر .. اجهضت حقنا في التحليق لفوق !
حقنا في أن نجتهد .. نخطئ و نصيب ..
حقنا في  أن نكون .

الحل اننا نفضل " نقاوح " !!

الحل نحترم حق بعض في الفرصة و المحاولة  .. و حتى الخطأ .. حقي و حق الآخر في أن يكون .. بتسامح و رحمه.


نفس المشكلة .. نفس الفخ 1
http://oceanbubble.blogspot.com/2011/07/blog-post.html