"بغير حساب"

Hi, it's me again,back!

لو طول عمرك اتربيت على أنه اللي يكلمك كلمه .. اللي يعيِّد عليك مره عيِّد عليه التانية وإن ما كلمكش مره احفظ كرامتك و إوعى تعبره !

اللي  يعزمك مره اعزمه مره وردها له . واحدة بواحدة .. كل حاجه واحدة بواحدة .. عشان لو واحدة باثنين تبقى كده أهبل وبيستكردوك !

This is Bullshit!

أي كلام.

في حاجات معينة ماينفعش تقضيها كده .. عشان  1- هتتعب قوي.   2- هتخسر كتيرحاجات ممكن تكسبها قوي.

ايه المشكلة لو ملفات معينة تعملها كده بقلبك وإيمانه قبل ما تصّدر فيها عقلك وحساباته , تفضل تصدقها وتستمر فيها وتداوم عليها .. كده !

تأملت في الفكرة دي لما فكرت في كام مرة الله الحق العدل الحكم جل جلاله ذكر في القرآن "بغير حساب" .. في الرزق .. في الجزاء ؛ جزاء الصابرين .. وأن هناك من خاصّهم الله يدخلون الجنة بغير حساب.

الحق العدل الحَكَم ذاته جعل أمور معينة "بغير حساب" .. والله أعلم.

يعني ايه المشكلة لو تخلي كام حاجه على جنب كده في حياتك تداوم على عملها "بغير حساب" ..

صلة رحم مثلا .. عمل خير معين تداوم عليه مهما حصل وتستمر فيه .. معاملتك للأب والأم .. معاملة المريض والضعيف .. معاملة كبار السن والعجائز.. اخلاصك في شغل مش راضي عنه .. إدارتك لحاجات انت بتحبها وهي جزء منك من غير مبررات وعرائض كتيرة وهري ..زي هواية أو شغف معين .. زي بلدك.

بلدك اللي لو حسبتها بالورقة والقلم ..هات وخد هتلاقيها حسبة خسرانة .. لكن حبها سؤال إجباري واختيارها أولوية. الاختيار لازم يتجاوب صح. وله إجابة واحدة بس اللي صح.

في ملفات معينة ماينفعش تفكر فيها وتتعامل فيها بندّية .. الأربح والأحسن إحسانا أن تكون "بغير حساب" .

مش لازم كل حاجة تتكايل وتتسعَّر وتتحسب واحدة قصاد واحدة .. عشان الدنيا تمشي .. وعشان تبقى أحلى .. ايه أجمل من انك تفكر كده تشيل حاجات على جنب بتعملها كده من غير حساب ومن غير تفكير كتير وتحتسبها عند ربنا .. وتشوف الكريم كثير الجود الشكور هيكرمك عليها إزاي. (عندك دي يا رب).