و إزاي أعرف أن الصيف جه ؟

hi, it's me again,back!

معقول السنه دي مافيش توقيت صيفي؟!!

النهار مش هيبقى طويل و الدنيا منورة لحد الساعة 8 !! مش هينفع أبقى للساعة 10 بره البيت و لسه بدري؟ مش هاينفع أريَّح دماغي و ما أقعدش أحسب فرق التوقيت ما بين KSA & CLT & UAE عشان أشوف أي فيلم عاMBCs أو دبي !! مش فجأه هلاقي ساعة زيادة جتلي من الهوا تفك زنقة المذاكرة ! مش هانزل الصبح بدري و ألاقي الشمس خفيفة ومش حامية قوي ! طب مش هاسمع عن حد فوِّت معاد عشان مش داري أن الساعة اتغيرت؟! و لا حتى نقعد يوم كده في السُطَل مش عارفين الساعة فعلا كام ؟!!

طب مش هأعرف آجي من الشغل و ألحق أشوف فيلم إمبارح في الإعادة من أوله ؟! يا خسارة

ايه ده .. طب أعرف ان الصيف جه إزاي ؟!

ممكن من إعلانات الأيس كريم لما تملأ التليفزيون .. لا لا ده شم النسيم .. أه من إعلانات أفلام سيما أول الموسم ..الأفلام اللي تشوفها و تفضل تحلم انك تروح تشوفها لمجرد انك مزنوق في مذاكرة الإمتحانات !! و لا يمكن من الأغاني على ميلودي لما تلاقي كل الفيديوهات بقت بحر و مايوهات!!

أكيد هأعرفه من العربية أم كاسيت عمرو الجديد ماشية تلف الشوارع و ترج الدنيا .. و لّا من صوت دوشة العيال و هما بيلعبوا كورة في الشارع من أم جول طوبتين !!

هأعرف لما أقدر أشوف الشمس و هي مروحة تنام في أول كل خروجه .. هأعرف لما ألاقي الدنيا زحمة على طول .. صاحية على طول و مابتنامش !

هأعرف لما ألاقى الشجرة اللي قدام بيتنا أوراقها اخضَّرت و زهزهت و فرشت ضلًّاية نتخانق مين يركن تحتيها و وردها الأحمر فارش الأرض و مغطي العربيات !

و لا العرق لما يغرق أرض الملاعب مع أحلى صحبة في" جيمايه " حلوة !

و لا الكهرباء لما تقطع كتير من "لود" التكييفات .. الأسهل أعرف من زنة التكييفات .. أو من نقطها اللي بتنزل فوق دماغي لما أمشي في شوارع الدقي أو وسط البلد :-)

أوممكن من العربيات لما تسخن كل يوم و تعطل على كوبري أكتوبر و نفضل واقفين للصبح !!

أكيد هأعرف لما ألاقي نفسي في البلكونة بضرب سما و بعِّد النجوم بأتنشَى على على نسمة هوا حلوه .. و هأعرف لما ألاقي كل 5 دقائق طيارة معدية فوق دماغي جايبه البعيد يقرّب و المشتاق يرتوي من النيل .. نيل مصر

أعرف منين أن الصيف هًّل بحره و حرارته.. أحلامه و شقاوته .. عرقه و مرحه و سهره !

مش كان أسهل أعرف بإعلان التوقيت الصيفي و خلاص ..

بس كده أحلى كتير .. رغم أي حاجه .. لأن الصيف ده صيف الحرية بجد .. صيف نظيف بعد ما زحنا إلي كانوا منجِّسين البلد .. هنغسلها بمية بحر اسكندراني تطهّر أرضها .

طبعا مش موافق يلغوا التوقيت الصيفي .. و صوّت بكده في استفتاء رئاسة الوزراء على النت.. أحلى حاجه إني قلت رأيي.. و الأحلى أنه بقى يفرق مع حد و يفرق و يتاخد بيه.

و طبعا لاغوه .. مش مشكله .. الأغلبية عايزه كده .. و أنا تحت أمر الأغلبية .. المهم أني قلت و شاركت أنا عايزه ايه ..تحيا الديموقراطية .. أي صيف هيبقى أحلى و أجمل بالديموقراطية سواء بتوقيت صيفي أو من غير .

و كل صيف و انتو طيبيين :-)