و مين قال ان الرزق فلوس

hi, it's me again, back!

أذكرأيام الدروس الخصوصية و السناتر - الله لا يعودها أيام - , و قت درس math1 و في أواخر السنة و كله متسربع و "المستر" عايز يُحشرني في أي مجموعه عشان دخلت معاه متأخر, الراجل كنت بأحسه مادي شوية .. ما أخبيش عليكو ساعات كنت بأحسه أبو لهب!!
لكن هذا الرجل في يوم قال حكمه حلوه جدا و اتعلمت منه كتير.
مره كنا في حصة زحمه جدا و كلنا كده فوق بعض و متأخرين في المنهج و عايزين نخلَّص و نراجع.. و كله "مزنوق" من الآخر..ثانوية عامه بقى و ما أدراكوا !!
المهم كان في طالب كده واد تقول ايه.. حاجه كده.. يعني تحسه قاعد زي "الحللوف" ..برغم معالم الثراء الفجَّه الواضحة عليه !!
الراجل يشرح ما يشرح و ده قاعد- تقدر تقول ممدد عالبنش - يضحك و يقوله مش فاهم .. يقعد الراجل يفهمه .. و الواد يتعامل مع كلامه كأنه طلاسم أو كأنه صحي فجأه و لقى نفسه على هذا الكوكب!!
في مزيج فريد و مستفز من الغباء و البلاهه و الاستهتار و اللامبالاه من جانب الولد
و محاولات مستميته متألمة تقاوم اليأس من جانب المدرس , و الذي يبدو أنه على معرفه جيده بأبو الولد لدرجة جرفته من الشعور بالاستفزاز و الغضب و "الخنقه" من الولد إلى الشعور بالشفقه .. الشفقه على غباء و استهتار و لامبالاة و لا شعور الولد.
و وجدناه ينظر إليه و يتنهد تنهيده عمييييييييقه و يقول:
مين قال ان الرزق فلوس !




ياريت لو حد بيقرا عربي يكتب تعليقاته على التدوينه دي و يقوللي هو الشايف الرزق ايه كمان غير الفلوس .. و لا ايه رأييكوا؟

:-)