التغيير اللي حصل و اللي هايحصل

hi, it's me again, back!



" أنا هانزل التحرير عشان لسه ما حاستش بالتغيير" شعار مرفوع حاليا, نعم الكثير مش حاسس بالتغيير .. و مازال " الشعب يريد اسقاط النظام " , الشعب يريد اسقاط نظام مبارك..الشعب يريد اسقاط الفساد في المؤسسات, الشعب يريد اسقاط  المحسوبية, و التمييز بالولاء لا الكفاءة, الشعب يريد اسقاط الفاسدين و الحرامية و الكدابين و المنافقين من المؤسسات المصرية و الحياة السياسية , الشعب يريد مسؤولين و مؤسسات تعمل وفق منظومة واضحة و فعَّاله من الحقوق و الواجبات بمرجعية أخلاقية إنسانيه ..يعني ببساطة أن البني آدم الشريف يقدر يشتغل بسلالسة و تناغم و كرامة .. طب إزاي لو لسه الحرامية و الفاسدين هم الي ماسكين حياته و واقفين له فيها ؟!! طب إزاي لو لسه مش قادر يشعر بالأمن ؟!.. طب إزاي لو لسه حقوقه و حرياته مش محفوظه ؟! طب إزاي لو العدالة مش متحققه ؟! طب إزاي لو خارطة الطريق للتحول الديموقراطي لسه مش واضحه و يتم الالتفاف عليها ؟!  طب إزاي لو لسه مافيش نظام ديموقراطي يعمل بشفافية في المؤسسات التي تؤثر مباشرة في حياة المواطن مثل المحليات و الجامعات و النقابات و االمحافظين ؟!

طب إزاي القانون لو مش بيتطبّق على كل المواطنين بعدل و مساواة ؟! طب إزاي لو الثورة قامت على الناس اللي وصلوا لمناصبهم بالتزوير و االنفاق و الفساد السياسي يبقوا لسه في مناصبهم بل يترقوا بل يشاركوا في القرار و التحول بمصر بعد الثورة ؟!!!

الشعب يريد تطهيييييييير البلاد ..الشعب يريد محاكمة الفساد .. الشعب يريد الأمن و الأمان .. كرامة حرية عدالة اجتماعيه

.............................................................

اللي لسه ماتغيرش ناس كتير كتبوا و يكتبوا عنه..ناس كتير مش هتهدى غير لما تحققه.

أنا أكتب اليوم عن التغيير الذي حدث بالفعل ..تغيير أحدثته ثورة ..التغيير الذي سيحقق و يضمن التغيير المنشود...

أكتب عن بلد صارت وطنا صارت حلما ..صارت وطني صارت حلمي صارت مشروعي..بلد بقت بتاعتي بقيت عايز أزرعها و أبنيها و أشتغل فيها و أعلليها..بقيت فيها مواطن عايز يغير فيها لأنه عارف أنه بقى يفرق .. بقى يقرأ عشانها .. بقي عايز يفهم ..بقى يكتب و يتكلم و ينزل و يشارك عشان عارف أنه يفرق..عارف أنها تخصه .. عارف أنها مسؤوله منه .. خايف عليها و عايز يطير بيها لفوق و يفرد دراعاته.. و يحميها بدمه و عينه لو لزم .. بقى مش عايز يسيبها , مش قادر يشتمها حتى لو بهزار زي الأول.. مابقاش يخاف من حد و لا من حاجه.. غير عليها.. مواطن عرف ان مرتبه ممكن ينزل النص بس صمم يشتغل بأمانه للآخر..عشان بلده .. مواطن بقى بيسمع صوت قلبه قبل طنين السيايين والمتلونين و" اللي فاهمين أكتر منه و عارفين مصلحته" !! مواطن بقى مصمم يبقى نبضه جوه قلب شعب يرفض أن يكون مفعول به و لا يرضى إلا أن يكون فاعلا.

مواطن بقى يقف في طابور طويل بالساعة عشان يصوِّت برأيه في مستقبل بلده.. مواطن بقى يقرأ الجرايد و يسهر أمام البرامج السياسية و يدخل أحزاب عشان يفهم و يشارك .. بقى ينظف شارعه بايده .. بقى يدهن و يجمِّل منطقته .. بقى يتحرك و يتكلم و يفهِّم و يفهم بعضه.. بقى يرفض أي انتهاك لحقوقه أو تجاوز من مين من كان .. حتى  لو مدرس بيضرب عيال في مدرسة يقوِّم الدنيا و ما يقعَّدهاش غير لما يتحاسب ..بقى عايز تغيير و مصمم يجيبه بنفسه.. بقى إيجابي .. بقى نفسه و بقى يعرف يختلف .
دا غير أنصاف مثقفين وأنصاف موهبه و مدعين حكمة و مُدَّعين فن و ناس تافهه و سطحية كانت مُنَّصبه رموز وقعت لوحدها و رجعت لحجمها الطبيعي .. من أول تامووره لحد رجل السي دي !!!

هو ده التغيير اللي حصل جوانا .. جوه المواطن المصري .. و هو ده التغييراللي حصل .. و هو ده التغيير اللي هايجيب و يحقق التغيير !