hi,it's me again, back!
الجمعه 27 مايو .. ده اسمها عندي .. عندي , ما اسمهاش جمعة الغضب الثانية و ما اسمهاش الثورة الثانية !
بأكتب عشان أقول نازله التحرير ليه .. مش هاكتب دلوقتي عن مطالب .. أنا بأكتب دلوقتي عن مواقف .
بأسجل موقف ..
موقف عايز يثبت ان مجرد مواطنه مصرية عادية لا تنتمي لأي حزب أو ائتلاف أو ايديولوجيه .. مجرد مواطنه مصرية وجدت بلدها و وطنها و عمرها و أحلامها في الثورة بقت مهتمه و مصرة تنزل و تشارك بسلمية و ايجابية و ديموقراطية و تحضر.. لأنها بقت عارفه أن رأيها و إرادتها بتفرق و مش هاتسلم رأيها و إرادتها و اختياراتها لحد يختارها و يحددها بالنيابة عنها.
موقف عايز يبيِّن خريطة المصريين .. يعني عايزة توضح أن مصر مش كلها إخوان و لّا سلفية .. و مصر مش بس الائتلاف الفلاني أو الحزب العلاني .. و مش بس نشطاء .. و مش بس اللي بيقولوا الجيش يمسك لحد ما مصر تستقر دون الجدول الزمني المتفق عليه .. و مش بس اللي بيقولوا الجيش يرجع ثكانته كفايه عليه كده .. و مش بس اللي بيقولوا أنا من حقي أقول و أعمل أي حاجه تحت اسم الثورة و تحت "الشرعية الثورية" دون الالتفات لرأي الشعب و أغلبيتة عبر العملية الديموقراطية .
موقف عايز يقول أنا مش هاستسلم لارهاب البلطجه و البلطجية .. يعني مش كل ما نيجي نعمل مظاهرة أو حدث أو ما يعبر عن الرأي باسلوب سلمي ديموقراطي متحضر و ملتزم بالقانون ييجوا البلطجية يبوَّظوه .. موقف عايز يقول لأ ..لأ للبلطجة و لأ للفوضى و لأ لوأد حقي في التظاهر عن طريق ارهاب البلطجه و البلطجية !
موقف يقول أني صاحي و موجود و شريك في الثورة دي و في بلدي كفاعل و ليس مفعول به .. عايز يقول بمنتهى السلمية و التحضر و الديموقراطية أن للثورة ثوار يحموها و يحرصوا على اكتمال و تحقيق مطالبها.
موقف بيقول لأ لأي تطرف في المواقف و أي رعونه أو حماقة ممكن تؤدي لصدامات بين عناصر الأمه من الجيش و الشعب بأطيافه .
موقف بيقول لكل فلول النظام السابق و المنتفعين من استمرار النظام السابق بكل فساده ..موقف بيقول لهم ..انسوااااااااااااااااا ..الشعب صاحي قوي و لا رجوع للخلف !
موقف بيقوا أننا لن نرضى بالفُتات و لا بأنصاف الحلول فيما يخص تحقيق الأمن و الامان .. فيما يخص العدالة و القصاص و محاكمة الفاسدين .. فيما يخص أي عبث أو مساس بوحدة المصريين .. فيما يخص كرامة و إنسانية المواطن المصري .
مواطن = موقف = رأي = إرادة = مصر حره = مصر مستقره = مصر ناهضة = مصر متحده
No comments:
Post a Comment