بلدياتى

بلدياتى

hi, it's me again, back!

استجابة للدعوة للتدوين يوم 23 مايو لإبداء الرأي في و ل المجلس العسكري , أكتب اليوم.

لأني أجدها شيء صحي و مفيد لمصلحة هذا البلد و مغذي و منشط  للمناخ الديموقراطي و مصر الدولة الجديدة التي قامت من أجلها الثورة, و أنطلق بهذه التدوينه من المقالة الرائعة لعمر طاهر في عموده (مصري أصلي ) في عدد  اليوم من جريدة المصري اليوم, اتفاقا مع اللغة و الأسلوب و المنتهَى من هذه المقالة.

إليك يا ابن عمي أكتب, ابن عمي و بلدياتي و دمي كمان ... أكتب و أنا أدرك أنك حميتني بدمك .. و أنا و أخوتي و أصدقائي و أبي و عمي و أهلي هم دمك .. ايد واحده.

ابن عمي آه .. بس ماينفعش كده!

ما ينفعش أنا أقوم بالثورة ضد العمده بدمي , و ولدي و عيوني .. عشان تبقى ثورة مش حركة و تعدي و لا مظاهره كبيره شوية..و مش عشان أسقط العمدة و كام خفير حواليه.. أنا عملت ثورة عشان مش عايزها تبقى عزبة !!

مش عايزها تبقى عزبة – أيّاً كان العمده - يمَّشيها زي ما هو عايز و ماحدش يقولّه فين و ازاي و بكام وليه  .. ومش عايزها تبقى عزبه للعمده و الخفر و شوية "أكابر" في البلد هم اللي يكلوها و يمصوا دم أهل البلد و اللي يتكلم فيهم يُطُطوخوه بالنار , و  شيخ البلد بيقى جاهز بقال الله و قال الرسول و أطيعوا أولي الأمر , و إلا تبقوا ................

لأ , مش عايز البلد تبقى ماشيه على مزاج شيخ البلد و العمده و الخفر و تبقى الدفتر دفترنا و الوق ورقنا .. و الدستور دستورنا؟

ماينفعش يابن عمي بعد ما وقفت جنبي في وقفتي تضيَّع حقي في كلام فارغ و حكاوي قهاوي عن العمده و أهل دوّاره و اتباعه برغم بديهيات العدل و الحق و القانون و القصاص مع اللي ظلمنا احنا الاثنين !

ماينفعش يابن عمي تسيب العِدا توقّع بين أهل البلد و تسيبهم يولّعوا و تتحول لتار بين الاخوات و تتفرج و لّا تستنى لما تشوف هاتوصل لإيه.. مش دا العشم يا بن عمي !

ما ينفعش ما تقدرش .. بصراحه مش بالعها انك مش قادر تحمينا.. .. انا وانت ..و مش عايز أصدق انك مش عايز.. عارف انك و كلنا متحملين فوق طاقتنا.. بس دي شيم الرجال .. وقت الشده الرجاله بتكون قدها و قدود .. و الرجال مواقف ! و لّا ايه يابن عمي !

يابن عمي أنا و انت عارفين أن الأرض مليانه دود ..دود يباكل في خيرها و مانع عنها الخير .. أنا و انت عارفين أن الأرض عطشانه و محتاجه كتير.. الأرض لازم تتقلب .. الأرض لازم تتطهر و تتنظف عشان يطلع الزرع الجديد و يرجع الخير.. مينفعش نردم على الدود و نسيبة يمص في خيرها و دمها !! ما ينفعش!

ما ينفعش أزرعها بنفس النظام القديم ..بنفس شيوخ الخفر.. و ذيولهم و نفس الأساليب .. أمَّال أحنا قومنا القومة دي عشان ايه؟؟ قوللي عشان ايه ؟ عشان أشقى و أتعب فيها وعمر ما يبقالي نصيب !! عشان قلبي يبقى عليها و يؤش الغريب !! و الله ماينفعش!

ما ينفعش يابن عمي تقولي ان خلاص الموسم ده مافيش غله مافيش حصاد و الأرض بارت .. زي ما تكون عايزني أبيعها ولَّا أسيبها , أسَلِّم أرضى و أستعوض !!  لا يابن عمي ما ينفعش.. و مش أنا و مش دلوقتي بعد ما رويتها بدمي و دم ولادي و بعد ما الكل فاق !

ماينفعش يابن عمي ترفض تسمعني و لا تكممني و لا تخرصني و تقولي انت الكبيرولّا تعيِّنلي عم صلاح بُعبُع يرهبني و يضحك على الملايين الطيبين  ..انت كبير على عيني , بس أرضنا أكبر و حلمنا أكبر و أكبر, و الوقت وقت مواقف الكلام مابقاش له نفس التأثير, ماخلاص من بعد ما العمده اللي فات ضحك عليا بطَّلت أسمع بقلبي , و غير عقلي و عينيه ما بقاش يجيب !

مالناش غير حل واحد .. نتفق و نكتب العقد.. نكتبه مع بعض و قدام الكل بعهد الله.. ويبقى اللي أوله شرط آخره نور .. يابن عمي .. عشان نبقى ايد واحده مش ايدتين بيلعبوا مصارعه _wrestling- و ممكن الكل يطلع خسران !

ماينفعش يابن عمي .. يابن عمي مش ده اللي اتفقنا عليه !!

يابن عمي مالناش غير بعض .. الغُرب حوالينا كتير و البلد عليها العين و كل الديابه مستنيين و البلد مليانه ثعابين .
بس كده الحال ده مش عاجبني و ما ينفعش و مش هاينفع !!

عارف يابن عمي انك طاحن نفسك عشاني و عشانك و عشان البلد ..ماحنا ملناش غير بعض.. و أنا معاك و ايد واحده .. بس كشريك واضح و صريح..  مش العمده الجديد !