هكذا أريدها ..

hi, it's me again, back !



هكذا أريدها..

أكتب عن جمعة 8 يوليو ..

مليونية .. اعتصام  .. بداية لثورة جديدة لتصحيح مسار ثورة 25 يناير .. هكذا أراها .

الأهم هو كيف أريدها .. أكتب بقلم من شارك أو بارك أو اهتم.. أكتب بقلم مواطنة مصرية تهتم بقول رأيها و مشاعرها.

أريدها انسانية ..

انسان نازل من بيته في الحر الشديد  الزحام عشان يساند أهالي شهداء اتحرق قلبهم على أولادهم , و اتبهدلوا عشان يأخذوا ابسط حق لهم .. و هو التقدير و القصاص .

اخوه انسانية .. تعاطف مع أخي الانسان .. اللي ممكن يكون مش مسنود و مالوش ظهر عشان كده اتقال عليه بلطجي.. و انسان تاني برده مش مسنود و لا ليه "أكاونت و فولورز" على تويتر يعملوا له هاشتاج أو وقفات احتجاجية لما يتقبض عليه !

تعاطف و مسانده مع أخي الانسان و حقه في الكرامة و القانون .. أخي الانسان اللي مش لازم عشان مش لابس براند أو ما بيعرفش يتكلم انجليزي كويس انه يبقى بلطجي و مالوش دية  و مش مشكلة لما يتمسك و يتسحل في أي قسم شرطة أو كمين .. أو يتشتم و يتهان من سعادة الباشا !

تعاطف و مسانده مع أخي الانسان اللي بياكل يوم بيومه .. و شغال بال12 ساعه و بيجري على رزق يومه في أرض الله و حاله واقف عشان السياحة واقفه.. حاله واقف عشان الطرق ممكن أحيانا تبقى مش متأمنه كويس .. عشان ناس كتير قلقانه و محتاجه استقرار و نظام و أمن و نبقى عارفين رأسنا من رجلينا و عارفين رايحيين على فين .. أخي اللي مماعهوش كريدت كارد ضامن ينزله عليها المرتب آخر الشهر .. أخي الانسان اللي في منطقة شعبية ممكن يكون البلطجية و الفتوات بيفرضوا سيطرتهم عليه في غياب الشرطة و فعاليتها !

تعاطف من قد يختلفوا في الامكانيات, المنطقة السكنية, الطبقة الاجتماعية, مستوى التعليم, مستوى الثقافة .............

لكنهم مشتركون في الانسانية.. و بالتالي يشتركون و يتفقون في الحقوق و الواجبات و المواطنة .

أريدها شعبية..

أريدها شعبية.. المصريين و بس.. انهارده مصريين و بس..مصري و بعدين أقول بعدها ليبرالي اخواني سلفي شيوعي..........

مصري الأول .. مصري الأهم .. مصري و بعدين أي حاجه.. مصري و بعدين من حزب كذا و تيار كذا و حركة كذا و ائتلاف كذا ........

مصري أولا . مصري كتييييييييييير أوي من اللي مالوش فيه .. و المصرييييين وبس الكتيييييييير قوي دول هم دول من يكونون "المليونيات" .. المليونيات لا تكون إلا بالمصرييييين و نقطة بعدها.. صحيح بتحريك و قيادة الحزب و التيار و الحركة و الائتلاف و النخبة السياسية .. لكن وحدهم لا يكونون المليونية الثورية.

شعبية .. من كل محافظة فيكي يا مصر .. من كل حي فيكي يا مصر .. من كل فئة فيكي يا مصر ..تحت مطلب و هدف و إراده واحده.

شعبية بالمشاركة .. و بالمباركة .. و بالوفاق و باحترام الشعب كلة لمواقف و إرادة أبناؤه دون تخوين أو تعالي.

أريدها سلمية..

سلمية سلاما .. أمنا و سلاما على الميدان و البلاد.. بدون "افتعال" احتكاكات .. احتكاكات ناس مع بعضها البعض جوه الميدان ..أو احتكاكات مع الجيش أو الشرطة .

سلاما و صدقا مع أنفسنا .. دون أن يخوِّن االي نازل اللي مانزلش .. أو يخوِّن اللي معتصم اللي ساب الميدان .. أو يستتفه اللي قاعد اللي نزلوا !

سلاما في اللفظ و الموقف .. دون أي تنازل أو خنوع .

أريدها وطنية ..

يعني مصر أولا. مصر ليست تيار واحد أو جماعة أو حزب أو مرشح .. مصر إرادة شعبية.. مصر االشعب يريد !

أريدها ثورية ..

يعني تغيير حقيقي .. تغييرالفكر و المنهج و السياسة و الأولويات.. فكر تقدمي و ليس "مُسكنات اليوم بيومه" ..منهج علمي ديموقراطي و ليس " ضبّش ضبّش " .. سياسة تحترم عقل و كرامة و حقوق المواطن و تعتمد على الشفافية و الاحترام المتبادل و ليس سياسة "طنش طنّش " و" سيبوهم يتسللوا " !

الشعب المصري هو الذي يحكم .. السيادة للشعب و القانون .. الشعب يريد تغيير يليق بثورة و ليس مجرد تغييروجوه أو مسميات !!

 و الشعب يريد اسقاط النظام لبناء نظام جديد نظيف بجد !

و لسه..

عيش      حرية           كرامة انسانية    عدالة اجتماعية       و الشعب يريد اسقاط النظام.

أريدها مصرية.

هكذا أريدها .. و هكذا هي .