hi, it's me again , back!
في يوم كنت مع أصحابى في محاضرة من محاضرات التنمية البشرية – كانت موضه قوي ساعتها حكاية التنمية البشرية دي ;-) - , كنا قاعدين في قاعة كبيره و كراسي منجده حلوة كده زي ما تكون قاعد في السينما, و فجأه بعد كلام كبيييييييييير قوي عن حياتك و "كاريرك" و تخطيط مستقبلك و مسارك و شخصيتك و أحلامك اللي هاتحققها , المحاضر عمل خاتمه حلوه قوي, طلب نطفي نور القاعة , و بقى النور مركز عليه هو, و قال لنا كل واحد يغمض عينيه و يسكت و يركز قوي ..
عايز كل واحد يغمض عينيه و يتخيل و يجمع كل شخص عرفته في حياتك ..من أول عائلتك لحد مدرسيك و أصحابك في الحضانه.. كل حد عرفته و تعاملت معه.. أثرت فيه و تأثرت بيه .. كل اللي تعرفهم و يعرفوك.
اجمعهم و استحضرهم كلهم قدامك .. أهُم .. كلهم قدامكو مستنيين يسمعوا هاتقول لهم ايه ...
يا ترى هاتقول لهم ايه .. عايز تقول آسف.. عايز تقول سامحوني .. لنبدأ صفحه جديده .. عايز تقول بحبكو كلكم .. كلهم قدامك دلوقتي .. يا ترى عايز تقول لهم ايه .. مش عايزك تقول لي .. عايزك تبقى عارف انت عايز تقول ايه ...
و أنا مغمضه .. و شايفه كل الناس اللي عرفتهم و قابلتهم و بقابلهم في حياتي .. أيوه.. شفتهم كلهم قدامي صف واحد كده .. بس ما لقيتش غير كلمة واحدة بس اللي جت على بالي أقولها بمناسبة هذا الجمع العظيم..
طُظ
T O Z !!!
No comments:
Post a Comment