إزاي بنعرف اننا كبرنا ؟

hi, it's me again, back.

هو احنا امتى و لّا ازاي بنعرف اننا كبرنا ؟ و العمر جري ؟

بتبدأ من أول لما بنعلن التمرد على المراجيح.

يمكن لو لقيت نفسك مش عايز تروح دريم بارك خلاص ؟ يعني لما تبطل تلعب ؟  لما تلاقي نفسك بتلعب كوره مره في الشهر لمدة 20 دقيقة و ترقد بعدها يومين ؟!

يمكن لو ما بقيتش تقدر تلعب سكاتينج ؟

يمكن لو مابقاش يهمك الألعاب اللي على موبايلك ؟

يمكن لو لقيت أصحابك في المدرسة بقوا أبهات و أمهات ؟

يمكن لو مشروبك الرسمي و المفضل بقى القهوة ؟

يمكن لو ما بقيتش أي نكته تضحكك ؟

يمكن لو ما بقيتش تضحك و انت بتشوف أفلام اسماعيل يس ؟

يمكن لو أي خروجه غير الكافيه و المول ما بقيتش تشدّك ؟

يمكن لما تستكبر تلبس الجزمه الكونفرس أم كاوتش أبيض من تحت و كاوتشه بيضه من قدام ؟

يمكن لما ما تقدريش تخرجي من غير شنطة ايدِك.. بأي حال من الأحوال حتى لو خارجه لجارتك اللي في الشقه اللي جانبك ؟!!!
يمكن لو شهادة و أخدنا, شغل و اشتغلنا , جواز و اتجوزنا, عيال و خلفنا ؟
ولّا لما تلاقي أحلامك صغرت و بقت عاديه جدا ..بعد ما كنت هاتلف العالم , هاتغير العالم .. و من بعد ما كنت انت العالم !
ايه ؟ كبرت ؟
طب هو ليه العمر جري و احنا مش واخدين بالنا ؟

عارف امتى تحس انك كبرت ..مش لما تجيب ال30 أو ال40 أو ال50 , لأ لما تبقى عايش عشان بكره بس و مش قادر تعيش انهارده و تفرح به و تستمتع به ! لما ماتبقاش قادر تحلم حلم جديد مختلف ما يلِقش غير عليك , لما ماتخافش و لا تتكسف تكون انت , لما تبقى صريح مع نفسك و مع مشاعرك صراحة الأطفال
طب العمر يفرق في ايه ؟
يفرق.. مش بالسنين .. يفرق بإنت عملت ايه و عشت عشان ايه .. و الأهم دلوقتي لسه هاتعمل ايه ؟ ناوي تقدم ايه .. تقدر لسه و لّا السنين كتفتك .. قيدتك  ب"إزاي " و "ماينفعش" و "دا يبقى جنون"  و "المنطق و المحسوب و المعقول" !! 
السؤال دلوقتي , عندي كام سنه .. و كام بجد  و ليه !