يعني ايه كلنا خالد سعيد ؟!

Hi, it’s me again, back !

من هو خالد سعيد ؟ هو خبر في الصحف  2010 عن شاب قُتل أثناء القبض عليه.. بعدها كلام أنه تم ضربه بعنف و تعذيبه أثناء القبض عليه و لقى حتفه إثر هذا العنف .. بعدها ناس قامت و قالت ايه اللي بيحصل .. بعدها تقارير و كلام طب شرعي متفبرك مايدخلش دماغ أي ساذج .. قاللك بلع حته حشيش وهما بيقبضوا عليه و أختنق بها .. و شهادات و تقارير طلعت من الداخلية في يوم بتقوللك متهرب من الخدمة أوشهادة سوء خلق بها أو أي افتراءات من هذا القبيل !!!

أكتب اليوم مش عشان أحكي ايه اللي حصل .. اكتب اليوم 6/6/2011  عشان لسه مش عارفين هم اللي كانوا رايحين يقبضوا عليه ..كان عشان ايه و بتهمة ايه ؟  و شهادات الداخلية بخدمته  مين اللي طلَّعها بالصورة دي و بالسرعة دي ؟

بعد سنه .. هل محدد و معروف كل المتهمين في هذا القتل ؟ هل صدرت أحكام ضدهم ؟ بعد سنه ؟

بعد سنه من استشهاد خالد سعيد .. و سيد بلال .. و ....... و ............ و غيرهم كثيرين قد لا نعلم أسماءهم , هل هناك ما يضمن من اجراءات و تفعيل للقانون و من عملية رقابية قانونيه و حقوقيه تضمن عدم تكرار حدوث هذا مع أي مواطن في مصر ؟!!

المشكلة بل المأساه الأكبر أن يكون المواطن نفسه مقتنع أنه مايقدرش يأخذ حقه من حرامي سرقه أو أحد اعتدى عليه أو أي أحد مختلف معه في الرأي أو الأيديولوجيه إلا عن طريق هذه الممارسات !!

اتذكر أني كنت غاضبه جدا و أنا أستمع لقضية خالد سعيد في التليفزيون , و كان بجانبي أحد المعارف و قال لي:

انتو محموءين كده ليه .. ايه المشكله ان المخبر يضرب واحد محشش ولّا بلطجي .. ده لازم .. انتو ايه عايزينها تبقى ازاي يعني ؟!

لأ مشكله.. و مشكلة كبيرة في إنسانية من يعتقد في هذه الثقافة السادية القهريه.. و يتخذها مبرر لممارسات وحشية ضد أي روح خلقها و كرمها الله .. ثقافة الظلم و الكذب و الافتراء .. و انك تفتكر انك فوق و تقدر تصدر أحكامك و تنفذها على البني آدمين بدون دليل و تحقيق عملية العدالة كاملة بكل حقوقها و واجباتها..

بعد سنه من استشهاد خالد سعيد , بعد سنين بل عقود من استشهاد معتقلين رأي .. داخل الأقسام و السجون و المعتقلات .. ناس عذبوا و قُهروا وتم التنكيل بهم ..حتى الموت .. لمجرد الاختلاف في الرأي أو التعبير عنه.

 أو مجرمين ارتكبوا جرائم و حوكموا عليها و تم التنكيل بهم داخل السجون ..

مسجون .. معتقل .. متهم .. أي واحد كان ماشى في الشارع و شكله ما عجبش ظابط الكمين .. خالد سعيد ..سيد بلال .. فلان الفلاني .. فلانه الفلانيه ..

أي بني آدم .. بني آدم ..انسان ..

أكتب اليوم عشان أقول انه بني آدم .. مهما كان اللي عمله .. يجب أن يكون هناك قانون يطبق بحذافيره و حقوقه وواجباته و عدالته ..قانون يحترم الإنسان ..

و مش اللي المفروض انه يحقق القانون و يطبقه يبقى مقتنع انه لازم يهين و يذل و يقهر و يعذب اللي قدامه كغاية أو وسيلة..

و لحين ما يطبق هذا .. و لحين يقدر يدخل أي مواطن قسم شرطة و هو آمن على كرامته و إنسانيته و حقوقه ..

كلنا خالد سعيد .